Reinhard Heydrich

Un article de Wikipèdia, l'enciclopèdia liura.
Fotografia de Reinhard Heydrich en 1940.

Reinhard Heydrich (7 de març de 1904, Halle – 4 de junh de 1942, Praga) èra un òme politic alemand que foguèt una figura majora dau nazisme e dau Tresen Reich.

Oficier remandat de la marina militara alemanda en 1931 après un afaire de mors, èra un esportiu complit. Venguèt sòci dau NSDAP en 1931 e lo cap de la SS, Heinrich Himmler, li fisèt rapidament de cargas importantas coma la creacion d'un servici d'entresenha. Après la presa dau poder per Adolf Hitler, participèt activament a la Nuech dei Lòngs Cotèus que veguèt la liquidacion de l'ala socializanta dau partit nazi e de centenaus d'adversaris d'Hitler en 1934. Puei, coma cap important de la SS, aguèt un ròtle important dins lei violéncias antisemitas deis annadas 1930 coma la Nuech de Cristau.

Luòctenent d'Heinrich Himmler, venguèt un dei personatges pus poderós dau Reich e participèt ais operacions importantas coma la formacion deis Einsatzgruppen destinats a l'eliminacion deis elèits, dei judieus e dei comunistas dins lei regions ocupadas d'Euròpa Orientala. Puei, presidèt la conferéncia de Wannsee e foguèt un deis artesans de la creacion dei camps d'exterminacion. En parallèl, nomat « protector » de Boèmia-Moràvia, i ordonèt una repression saunosa que li vauguèt lo subrenom de « boquier de Praga ». Pasmens, aquò l'empachèt pas d'èsser victima d'un atemptat oganizada per la resisténcia chèca. Sa mòrt entraïnèt de represalhas murtrieras de part dei SS que tuèron probablament un milier de civius ambé la destruccion de plusors vilatges (Lidice, Lezaky... etc.)

Liames intèrnes[modificar | Modificar lo còdi]

Bibliografia[modificar | Modificar lo còdi]

Nòtas e referéncias[modificar | Modificar lo còdi]