Rèire-gàrdia
Una rèire-gàrdia es la fraccion d'una unitat militara qu'es encargada d'empachar una ataca de l'enemic a l'arrier d'aquela fòrça. En cas de retirada, pòu tanben èsser encargada d'alentir la persuida advèrsa per permetre a la fòrça principala de s'enfugir. Per aquò, la rèire-gàrdia es sovent compausada de tropas experimentadas e aguent un bòn morau.
Organizacion teorica de la rèire-gàrdia
[modificar | Modificar lo còdi]Una rèire-gàrdia es sovent constituïda d'una fraccion febla de l'armada. D'efiech, levat d'una situacion de retirada, una ataca a l'arrier es rara car una fòrça en movement es supausada contraròtlar sei linhas de comunicacion. Una error grèva dau comandament es donc sovent la causa premiera d'una tala ataca. D'un biais pus susprenent, la rèire-gàrdia d'una armada en retirada es tanben sovent reducha. Aquò s'explica per lo fach que la rèire-gàrdia dèu pas tenir lo terren durant una durada lònga. De mai, dins aqueu cas, son movement naturau l'aluncha regularament de l'ataca enemiga. Ansin, es pas necessari de la renfòrçar car aquela possibilitat de retirament li permet de demenir la pression. Aquò demanda que la rèire-gàrdia garde sa libertat de movement. Dins lo cas contrari, sa situacion pòu rapidament venir complicada.
Lo combat d'una rèire-gàrdia encargada de protegir una retirada es un pretzfach defensiu que necessita de desplaçar seis unitats d'una posicion defensiva vèrs una autra d'un biais regular. Pasmens, aquò enebís pas d'accions ofensivas localas destinadas a alentir l'adversari ò a destrurre una de seis unitats aventuradas imprudentament dins una zòna riscada.
Exemple istoric
[modificar | Modificar lo còdi]La batalha de Rorke's Drift se debanèt dau 22 au 23 de genier de 1879 durant la Guèrra Anglozolo après la destruccion d'un regiment britanic a la batalha d'Isandhlwana (22 de genier de 1879). D'efiech, après aqueu combat, la resèrva zolo comandada per lo prince Dabulamanzi kaMpande (4 000-4 500 òmes) èra desirosa de participar a la guèrra. Decidèt donc d'atacar la basa britanica de Rorke's Drift qu'èra defenduda per quauquei desenaus d'òmes renforçats per de bleçats d'Isandhlwana.
Pasmens, lei Britanics aguèron lo temps de renfòrçar sei defensas. Ben motivats, poguèron establir de posicions de tir eficaças que causèron de pèrdas importantas dins lei rengs deis asalhidors. En causa de la manca de municions, deguèron pauc a cha pauc recular mai foguèron sauvats per l'arribada de la nuech e l'amplor dei pèrdas infligidas a seis adversaris. D'efiech, lei Zolos perdiguèron 351 tuats e 1 100 bleçats durant lei combats e foguèron obligats de se retirar. Aqueu succès defensiu permetèt ai Britanics de protegir la retirada de l'ensemble de seis unitats per tornar formar son dispositiu e organizar una ofensiva novèla après l'arribada de renfòrç venguts d'Euròpa.
Annèxas
[modificar | Modificar lo còdi]Liames intèrnes
[modificar | Modificar lo còdi]Bibliografia
[modificar | Modificar lo còdi]- (fr) Michel Yakovleff, Tactique théorique, 3a edicion, Economica, 2016.