Flanc-gàrdia

Una flanc-gàrdia es la fraccion d'una unitat militara qu'avança lateralament a l'aisse de progression d'una fòrça armada. Assegura generalament un pretzfach defensiu qu'es destinat a empachar ò alentir una ataca còntra una deis alas d'aquela armada. Es un tipe de combat complèx car necessita d'orientar l'aisse de sa poissança vèrs l'exterior dau dispositiu e, en parallèl, de demorar capable de seguir lo movement de la fòrça principala. Per aquò, una flanc-gàrdia es generalament de tropas fòrça mobilas (cavalariá leugiera, infantariá montada, etc.). Una armada en movement pòu aver una ò plusors flanc-gàrdia segon sei besonhs.

Organizacion teorica d'un flanc-gàrdia

Exemple de movement au sen d'una flanc-gàrdia compausada de quatre unitats de cavalariá. L'objectiu es de blocar lei rotas permetent una ataca rapida de la fòrça principala.

Escalonament de la flanc-gàrdia

D'un biais generau, una flanc-gàrdia es organizada lateralament a la fòrça de protegir en tres compausantas. Premier, normalament au contacte de l'enemic, se tròba la « linha de susvelhança ». Son ròtle es de detectar un cambiament eventuau que pòu èsser l'indici d'una avançada de l'enemic en direccion de la fòrça de protegir. Puei, ven la « linha d'aplant » que sa mission es de blocar aquela avançada, au mens per un temps. Una bòna linha d'aplant es generalament installada sus de posicions favorablas a la defensa. Pasmens, la natura d'aquelei posicions pòu variar segon lo tipe de defensa considerat. La possibilitat d'un secutament de la fòrça enemiga es tanben de còps adoptada. Enfin, darrier la linha d'aplant, la flanc-gàrdia dèu dispausar d'una « rocada » permetent lo desplaçament de seis unitats. Aquela rocada dèu normalament èsser destinada ai movements de la flanc-gàrdia per pas geinar sa manòbra e pas trebolar aquela de la fòrça principala.

Movements d'una flanc-gàrdia

Per assegurar sa mission, una flanc-gàrdia es normalament compausada d'unitats mobilas e aisament intercambiablas. Ben sovent, totei leis unitats son identicas. Son plaçadas lòng de la linha d'aplant ò en resèrva sus la rocada. Un aisse de comunicacion lia lei posicions tengudas lòng de la linha d'aplant e la rocada. La flanc-gàrdia seguís la progression de la fòrça principala. Per aquò, quand es necessari, una unitat situada lòng de la rocada se dirigís vèrs una posicion de la linha d'aplant ò una unitat de la linha d'aplant abandona sa posicion per tornar se posicionar sus la rocada. Dins certanei cas, lo movement pòu èsser continü : abandon de la linha d'aplant, trajècte lòng de la rocada e installacion sus una posicion novèla lòng de la linha d'aplant.

Exemple istoric

Esquèma generau de l'ofensiva coalizada còntra Iraq amb l'accion de flanc-gàrdia dei fòrças francesas sus l'ala senèstra.

Article detalhat: Operacion Daguet.

Durant la Guèrra de Kuwait (1990-1991), lei fòrças francesas plaçadas sus l'ala senèstra de l'ataca menada per la Coalicion còntra lo sud d'Iraq foguèron encargadas de rompre l'ala drecha iraquiana e de se posicionar en flanc-gàrdio per protegir lo rèsta dei tropas coalizadas. Per aquò, après aver atacar per prendre l'aeropòrt d'As Salman situat a 150 km de la frontiera, la division francesa s'installèt per observar e protegir un frònt larg orientat vèrs lo nòrd-oèst.

Annèxas

Liames intèrnes

• Avans-gàrdia.
• Rèire-gàrdia.
• Resèrva.

Bibliografia

• (fr) Michel Yakovleff, Tactique théorique, 3^a edicion, Economica, 2016.