Ornithodesmus

Un article de Wikipèdia, l'enciclopèdia liura.
Salta a la navegació Salta a la cerca
Es paucs uassi que'an trapat enquia aué d'Ornithodesmus hén pensar qu'ère un ancessor deth gegant des aires preistorics, Quetzacoatlus.

Un quatau genre de pterosaure deth cretacèu siguec discurbert en Anglatèrra en Walden, ena isla de Wight. En 1887 eth paleontològ anglés Harry Govier Seeley descriguèc un uas sacre deth cretacèu inferior d'Atherfield e pensèc qu'ère d'un audèth qu'aperèc Ornithodesmus claniculus Seeley. Dempús diguéc qu'ère un pterosaure e plaçèc en aguest genre troçi deth cran , còth e vertèbres dorsals, uassi deth pit e troçi dera ala d'un fossil d'Atherfield, ena isla de Wight. Coma que es dents èren plan amples aperèc era espècie Ornithodesmus latidens.

En paleontologia tostemps i a confusion quan s'apera ua espècie. Aguest sacrum descrit per Seeley ère ne d'un audèth ne d'un pterosaure mès un terapod petit ( dinosaure). Ei atau qu'eth nom Ornithodesmus apera un dinosaure e tanben ua espècie de pterosaure; Ornithodesmus latidens. Peth moment ei utilizat tà aperar eth pterosaure trapat ena isla de Wight.

Ornithodesmus ère un pterosaure plan gran damb ua ala de 5 m. Eth final dera maissa ère ampla e rond, parièr ath d'un lit. Pr'açò, de còps, se ditz pterosaure-lit. Mès ère disparièr d'aqueth pr'amor qu'auia dents. Eth horat der uelh ère petit e plaçat plan endarrèra en eth cran. Es sieis prumères vertèbres èren fusionadades en un notarium que gahaba es uassi pectorals. Es dents èren hòrtes e amples e açò hè pensar qu'Ornithodesmus minjaua peishi mès era sua tecnica ère disparièra.

Es sieis prumères vertèbres formaven un notarium. Aguest hèia 17,25 cm. Coma qu'Ornithodesmus a sigut pas trapat enlòc mès en eth mond aguest genre ei d'ua familha pròpia, es Ornithodesmids ( o Ornithodesmidae). Ère eth quatau genre de pterosaure deth cretacèu discurbert en Anglatèrra, dempús d'Ornithocheirus, Criorhynchus e ua trobalha de plaques caucinoses proches a Swange, ena costa de Dorset e aperada Doratorhynchus. Aguest siguec discurbert en 1875 e ère un pterosaure plan gran damb un còth plan long. De segur qu'ère er ancessor des pterosaures gegants de Tèxas coma Quetzalcoatlus damb qui ère plan semblant enes sues vertèbres.

Hònt: The Illustrated Directory of Dinosaurs ans Other Prehistoric Creatures, Greenwich Editions, 2005.