Criorhynchus
Richard Owen, eth conegut paleontològ anglés, arreconeguéc un pterosaure gran en es plaques de sable verd de Cambridge e l'aperèc Criorhynchus. Sonque troçi d'uassi an sigut trapats d'aguesta espècie. Era caracteristica mès grana ei eth final dera maissa. Qu'ei solida e bordesca tot e qu'a sigut esclafada laterauments. Era maissa superior ei plana e damb serra ath final. Es maisses auien ues dents poderoses entà naut e leugeraments corvades entà darrèr. Aguesti traches tipics deth genre Criorhynchus se basen sonque en un troç de maissa. Sir Richard Owen plaçèc d'autes uassi deth madeish lòc en aguest genre mès un classament definitiu ère impossible.
Es paleontològs tostemps an pensat coma podie auer sigut Criorhynchus, un pterosaure damb ua ala de 5 m. Eth paleontològ de Viena G. von Arthaber sajèc de hèr ua rebastida deth cran en 1919. Aguèc atau un cran plan cuert de 18 cm de longada, disparièr d'autes crans de pterosaures deth cretacèu ja coneguts. Mès adara i aguèc un descurbiment en tèrres d'America deth Sud.
En Brasil, ena formacion de Santana se trapèc un cran de pterosaure plan ben conservat. Siguec descrit coma Tropeognathus. Eth deuant dera maissa ère plan semblant ath de Criorhynchus. En eth deuant quèia de còp e s'espandia entàra darrèra ena forma d'ua cresta de uas que tanben anava entà naut. Aguesta cresta ère semicircular en naut e sonque ena part final dera maissa. Se pensa qu'ère utilizada tà la hicar laguens dera aigua coma ua quilha d'un batèu mentres gahava peishi pendent eth vòl e açò ère ua ajuda tà estabilizar eth cap pendent hèia aquerò.
Adara ère clar qu'eth final dera maissa de Criorhynchus ère ua cresta de uas parièra ara de Tropeognathus. Criorhynchus auia donques un cran plan mès long qu' Arthaber auia pensat. Qu'aguesti dus genres auessen tanben traches comuns vò díder que benlèu èren dera familha des Criorhynchoidae.
Hònt: The Illustrated Directory of Dionsaurs and Other Prehistoric Creatures, Greenwich Editions, 2005.