Movement dei Corsets Jaunes

Lo movement dei Corsets Jaunes en França es un movement sociau espontanèu qu'apareissèt en octòbre de 2018 e s'estendèt dins de proporcions mendras a d'autres país. Tròba son ourigina dins la difusion sus lei rets socialas d'encoratjaments per manifestar.

Manifestants davant la comuna de Belfòrt (1er de decembre de 2018).

Corsets Jaunes sus un giratòri a Montalban (Occitània)

.

La mobilizacion si motivèt au començament per la denegacion de l'aumentacion de la taxa interiora de consumacion sus lei produchs energetics (TICPE). S'alarga rapidament a d'autrei revendicacions fiscalas e socialas (auça dau poder de crompa dei classas mejanas e populàrias, mantèn dei servicis publics, taxacion dau querosène e dei fiols maritimes, restabliment de l'ISF...), ensin que politicas (melhorament de la democracia representativa, especialament per lo referendum d'iniciativa ciutadana, demission dau President de la Republica, Emmanuel Macron...).

A partir dau 17 de novembre de 2018, lo movement s'organiza a l'entorn de blocatges de rotas e giratòris e de manifestacions nacionalas cada dissabte. L'oupinion publica sosta per la màger part lei protestacions, que tròban un sostèn fòrt en zòna rurala e periurbana, mai s'estendon tanben ai gròssei vilas, onte de violéncias au moment dei manifestacions setmanieras provòcan de degalhs materiaus importants e donan luec a foaça arrestacions. A l'oucasion de recampaments locaus, dètz personas moaron e de centenaus d'autras si fan bleçar, mai o mens grevament, especialament dau caire dei manifestants.

Au començament lo poder executiu èra ostile a tota revendicacion dau movement, mai finalament renonciá a l'auça de la TICPE e anonciá de mesuras que lei manifestants jutjan insufisentas e que meton pas tèrme a la contèsta.