Ret sociala
En sciéncias umanas e socialas, l'expression ret sociala designa una coordinacion de liames entre d'individús e/o d'organizacions que constituisson un gropament qu'a un sens : la familha, lei collègas, un grope d'amics, una comunautat, etc.
L'antropològue australian John Arundel Barnes introduguèt l'expression en 1954. L'analisi dei rets socialas venguèt una especialitat universitària dins lo domeni de la sociologia, e si fonda sus la teoria dei rets e l'usatge dei grafes.
L'expression "ret sociala" dins l'usatge abituau remanda generalament a aquela de "mejans sociaus", que cuèrbe leis activitats diferentas qu'intègran la tecnologia, l'interaccion sociala entre d'individús o de gropes d'individús, e la creacion de contengut. Andrea Kaplan e Michael Haenlein lei definisson coma "un grope d'aplicacions en linha que si fondan sus la filosofia e la tecnologia de l'Internet e permeton la creacion e lo cambi dau contengut generat per leis utilizators".