Marianne Cohn
Marianne Cohn (17 de setembre de 1922, Mannheim - 8 de julhet de 1944, Ville-la-Grand) foguèt una resistenta alemanda josieva que participèt a la Resisténcia Francesa dins lo corrent de la Segonda Guèrra Mondiala. Capturada e assassinada per leis Alemands, es considerada coma l'autora dau poèma Je trahirai demain, pas aujourd'hui (« Traïrai deman, pas uei » en occitan).
Èra l'ainada d'un pareu d'intellectuaus alemands d'origina josieva exilats en França per fugir lo nazisme. Lei parents foguèron internats dins lo camp de Gurs car ciutadans alemands mai leis enfants foguèron pres en carga per leis Exploraires Israelitas de França onte descurbiguèron la practica religiosa dau judaïsme.
En 1941, Marianne Cohn intrèt au sen dau Movement de la Jovença Sionista (MJS) e, tre l'annada seguenta, acomencèt de s'ocupar d'enfants josieus menaçats de desportacion. Arrestada un premier còp a Niça, foguèt estremada tres mes. Après sa liberacion, s'ocupèt d'un grop novèu de 28 enfants e foguèt cargada de lo menar en Soïssa en genier de 1944. Pasmens, foguèron arrestats a 200 m de la frontiera lo 31 de mai. Gràcias a l'ajuda de Jean Deffaugt, premier cònsol d'Annemasse, e de divèrsei resistents locaus[1], leis enfants foguèron rapidament liberats e esconduts fins a la fin de la guèrra. En revènge, Marianne Cohn demorèt en preson onte foguèt torturada e finalament assassinada dins la nuech dau 7 au 8 de julhet per un grop de la Gestapo de Lion.
Quauqueis annadas après la guèrra, un enfant portèt una letra au burèu generau dau MJS. Conteniá lo tèxte dau poèma Je trahirai demain, pas aujourd'hui que seriá estat redigit per Marianne Cohn, probablament dins lo corrent de sa premiera detencion. En mai d'aquò, Marianne Cohn recebèt divèrsei decoracions ò onors postums coma la Crotz de guèrra. Un jardin pòrta tanben son nom dins lo Memoriau de Yad Vashem.
Liames intèrnes
[modificar | Modificar lo còdi]Bibliografia
[modificar | Modificar lo còdi]Nòtas e referéncias
[modificar | Modificar lo còdi]- ↑ Après la guèrra, Jean Deffaugt, Ernest Balthazard (adjonch), Joseph Fournier e Emile Barras foguèron nomats Justs entre lei Nacions.