M270
Lo M270 MLRS es un lança-roquetas multiple desvolopat per leis Estats Units d'America a la fin deis ans 1970 e au començament deis ans 1980. Intrat en servici en 1983, foguèt adoptat per leis armadas pus importantas de l'OTAN (Estats Units, RFA, Reiaume Unit, França...). Son aparicion marquèt una revolucion a respècte dei modèls precedents car sei performàncias son, en teoria, quasi similaras a aquelei d'una arma nucleara tactica. D'efiech, una batariá de 9 unitats es capabla de tirar 108 roquetas portant 69 000 grenadas en una minuta. La superficia cubèrta per aqueu bombardament es de l'òrdre de 700 ectaras. Pasmens, aquel armament a un còst important e necessita lo mestritge d'una gama larga de tecnologias de susvelhança dau prat batalhier per detectar lei fòrças enemigas, coordenar lei tirs e guidar lei roquetas fins a son objectiu.
Lo M270 MLRS foguèt utilizat amb succès per leis Estatsunidencs e lei Francés durant la Guèrra de Kuwait (1990-1991) còntra d'objectius isolats ò de pòchis de resisténcia iraquianas. En 2003, dins lo corrent de la Segonda Guèrra d'Iraq, l'armada estatsunidenca l'utilizèt tornarmai d'un biais pontuau per rompre lei defensas iraquianas a l'entorn dei vilas, especialament Nadjaf, Nasiriyah e Karbala.