Libre de Sidrac
Lo Libre de Sidrac es una òbra anonima escricha entre 1270 e 1300. Lo libre, que coneguèt de prestigi fins al sègle XVI foguèt revirat dins mantas lengas europèas (alemand, anglés, catalan, italian e neerlandés), se presenta subretot jos la forma d'un dialòg entre un rei, Boctus, e un filosòf nomenat Sidrac. Lo monarca li pausa 1227 questions sus de tèmas variats (filosofia, religion, morala, medecina, astrologia, botanica, mineralogia etc.) e l'erudit i respond.
E mai se d'unes afirman que la version francesa es la mai anciana, lo romanista occitan Josèp Anglada pensava que lo tèxt occitan èra anterior. Dos manuscriches en lenga d'òc son estats servats d'aquesta narracion, lo mai ancian d'aquestes escrich entre 1275 e 1325, supausat d'origina carcinòla, es servat a la Bibliotèca Nacionala Francesa mentre que la segonda version, posteriora, nos ven de l'erudit arlatenc Bertran Boisset que la copièt en 1372.