Legion Estrangiera
La Legion Estrangiera es una formacion militara francesa compausada de soudats volontaris d'origina estrangiera[1]. Creada en 1831, es l'eiretiera deis unitats de volontaris estrangiers deis armadas reialas e revolucionàrias. Es pauc a pauc venguda una formacion d'elèit dei fòrças armadas francesas qu'es famosa per sei fachs d'armas (Camerone, Bir Hakeim...). Per aquò, utiliza de metòdes d'entraïnament considerats coma durs per crear un « esperit de còrs » poderós que li permet de mantenir la coësion de seis unitats. Aquò es completat per un unifòrme, una musica e de tradicions especificas. Son element pus conegut es lo quèpi blanc que fa partida de la tenguda de basa dau legionari.
En 1962, seis efectius agantèron 40 000 òmes mai lo nombre de legionaris foguèt pauc a pauc reduch. Pasmens, la Legion demòra una compausanta importanta de l'Armada de Tèrra amb 9 000 òmes despartits dins 12 unitats en 2020 especializadas dins plusors dimensions dau combat terrèstre (infantariá, cavalariá, tropas aeroportadas, engèni militar, etc.). Sei basas principalas se situan en Occitània, principalament dins lei Bocas dau Ròse e en Gard.