Irmandades da Fala
Leis Irmandades da Fala (« Frairiás de Lenga » en occitan) foguèron una organizacion nacionalista galèga activa de 1916 a 1936. Foguèt la premiera organizacion politica de Galícia qu'utilizava unicament lo galèc. Foguèt fondada a l'iniciativa d'Aurelio Ribalta, autor d'una crida per protegir lo galèc en 1915, d'Antón Vilar Ponte que menèt una campanha de premsa per organizar una Liga deis Amics de la Lenga Galèga en març de 1916 e d'Antón Losada Diéguez. Son programa èra d'obtenir l'autonòmia totala de Galícia, l'intrada de Galícia dins la Societat dei Nacions e la formacion d'una union ambé Portugal. Au sen de Galícia, voliá establir un parlament elegit per lo pòble, un poder judiciari independent, l'establiment de drechs egaus per leis òmes e lei fremas, la supression dei deputats provínciaus e l'adopcion dau galèc e de l'espanhòu coma lengas oficialas de la region.