Ice MC

Ice MC (2008)

Ice MC, nascut Ian Campbell lo 22 de març de 1965 a Nottingham (Anglatèrra), es un cantaire e rapaire anglés d'origina jamaïcana. Es conegut per èsser l'un dels cantaires los mai populars de la tècno dance dins las annadas 1990, pas mens de tres tubes de la sola annada 1994, emblematics d'aquel estili (Take away the Colour, Think About the Way, It's a rainy day), essent d'el. Es estat acompanhat de la cantaira Alexia a partir de 1994.

Biografia

Cantaire anglo-jamaïcan, Ice MC s'installa au mièg de las annadas 1980 en Itàlia, a Florença. Es a n'aquela epòca que se lança dins la musica, e en 1989, en plena periòde house, sortís lo títol Easy, son primièr single e sa primièra collaboracion amb lo productor italian Robyx. Easy es una capitada internacionala e ven aital un estandard de la musica house.

En 1994, Ice MC sortís Take away the colour, un single novèl que va marcar una virada artistica : en efièch, Ice MC renóncia ambe aqueste títol a la house primitiva de la debuta, cambia d'estili e se vira cap a la tècno dance en s'adaptant au sens larg a la mòda "eurodance" d'aquesta periòda, un estili que seguís un esquèma plan precís, una bocla melodica principala e dançarèla, un passatge au frasejat rap o ragga, e un repic puslèu pop interpretat per una votz femenina. Per la votz femenina, Robyx, son productor, engatja alavetz la corista Alexia, qui en seguida l'acompanha tanben sus scèna.

Sa capitada va anar au delà de totas las esperanças : serà en efièch colossal, amb un pic en 1994 e 1995 que coïncidís ambe lo de la tècno dance (Masterboy, Cappella e Maxx son tanben au som a n'aquesta meteissa periòda), e que permet a Ice MC de cantar sus los emponts dels quatre cantons del monde. Ice MC se retròba quitament en cap dels classaments de ventas de disques dins de nombroses païses.

En 1996, collabòra ambe lo grop tècno-dance anglofòn alemand Masterboy per adobar son quatren album estudiò Dreadatour.

Pr'aquò la decadéncia de la mòda "eurodance" e mai especificament de l'estili tècno-dance a partir de 1996 menarà a la casuda artistica de Ice MC coma de tant d'autres d'aqueste meteis registre (Masterboy, Dr. Alban, La Bouche, Maxx, Cappella, Haddaway, 2 Unlimited, U96...), e quitament se "l'eurodance" tornarà d'un biais episodic a la mòda jos de novèlas formas mai tard, Ice MC e la màger part dels artistas de la primièra èrsa tècno dance de la periòda 1992-1996 van desaparéisser del davant de la scèna.

Discografia

• 1990: Cinema
• 1991: My World - The Early Songs
• 1994: Ice'n'Green
• 1996: Dreadatour
• 2004: Cold Skool

Cançons mai conegudas

• Easy (1989)
• Take Away The Colour (1994)
• Think About The Way (1994)
• It's A Rainy Day (1994)
• Give Me The Light (1996)