Han Fei Zi

Han Fei Zi († 233 avC) es un filosòfe chinés dau segle III avC. Los detalhs de sa vida son unicament coneiguts per d'obratges posteriors a sa mòrt, en particular lo Shiji de l'istorian Sima Qian. Èra probablament un prince de l'Estat de Han a la fin dau Periòde dels Reiaumes Combatents. Participèt a las guerras finalas de l'unificacion de China e ensajèt d'empachar l'invasion de son reiaume per las armaas de Ying Zheng de Qin, lo futur Qin Shi Huangdi. Victima d'intrigas a la cort de Qin, se suicidiguèt.

Una partia de sos escrichs son perduts, mas una compilacion de 55 de sos textes a subreviscut. Dins aquelos escrichs, Han Fei Zi es un promotor quasi extremista de la pensaa legista. Es ansin favorable a un Estat poderós capable d'assegurar lo respècte de leis fòrça estrictas, l'atribucion de recompensas als subjectes obeïssents e una condamnacion infalhibla dels contravenents. Son òbra inspirèt en partia la politica autoritària de Qin Shi Huangdi, lo prumier emperaire de China.

Ligams internes

• Legisme.

Bibliografia

• (fr) Jonathan Clements, Le Premier Empereur de Chine, Éditions Perrin, 2006.
• (en) Burton Watson, Han Fei Tzu: Basic Writings, Nòva York, Columbia University Press, 1964.