Eugèni Garcin

Un article de Wikipèdia, l'enciclopèdia liura.
Anar a : navigacion, Recercar

Eugèni Garcin (en francés Eugène Garcin; Alens, 31 de decembre de 1831 - Anthony (Isla de França), febrièr de 1909) foguèt un jornalista e escrivan occitan.

Biografia[modificar | modificar la font]

Eugèni Garcin nasquèt dins una familha modèsta, son paire èra manescau. Faguèt d'estudis que li donèron un nivèu pron bòn per s'endralhar devèrs l'escritura e lo jornalisme. Escriguèt dins sa joventut de poesias en occitan que foguèron publicadas per Romanilha en 1851 dins l'òbra collectiva Lei Provençalas. Participèt au Romavatge dei Trobaires d'Ais de Provença en 1853. Venguèt amic de Mistral e dei primièrs felibres e escriguèt sovent dins l'Armanac Provençau. Se n'anèt a París e en 1861 se maridèt amb una directritz dau pensionat ont trabalhava. Comencèt sa carrièra jornalistica e venguèt en 1868 un dei collaboradors dau jornau marselhés Le Peuple. Quand se proclamèt la Republica, foguèt causit coma sos-prefècte de Mureth. Un pauc mai tard laissèt aqueste trabalh per venir jornalista a Tolosa. Capitèt de venir director dei jornaus L'Émancipation e puèi de L'Avenir du Gers e a l'encòp corriá lo país per espandir leis ideaus revolucionaris.

Aprèp que Mistral publiquèsse Calendau, Garcin se faguèt remarcar d'un biais vesedor quand ataquèt l'escrivan de Malhana dins son libre Les français du Nord et du Midi e declarèt que leis idèas e concèptes de l'òbra èran separatistas. Quand se faguèt lo còp d'estat lo 16 de mai de 1876 se n'anèt en Belgica. En 1895, comencèt a frequentar lei felibres parisencs e venguèt puèi vicepresident d'aquela associacion. Se pretendèt qu'èra un dei sèt felibres qu'aviá fondat lo felibritge e que son nom èra estat cambiat per lo de Joan Brunet. Publiquèt la revista La Provence a la debuta del sègle XX.

Ligams extèrnes[modificar | modificar la font]