Emili Aldin

Un article de Wikipèdia, l'enciclopèdia liura.
Anar a : navigacion, Recercar


Emili Aldin (en francés Emile Aldy; Milhau, 17 de julhet de 1853 - Narbona, 25 d'abril de 1921) èra un politician occitan, que foguèt Deputat d'Aude de 1902 a 1919.

Biografia[modificar | modificar la font]

Emili Aldin nasquèt en 1853 a Milhau e aprèp qualques estudis classics a Tolosa e puèi de drech a Ais de Provença, tornèt en çò sieu e venguèt avocat estagiari a Milhau.

Mai tard venguèt magistrat e foguèt nomenat substitut del Procuraire de la Republica a Limós d'en primièr e puèi en 1880 a Narbona. En 1883 arribèt a venir Procuraire de la Republica mas demissionèt en 1887 quand se botèt en plaça la refòrma de la magistratura en seguida del procès en difamacion dobèrt pel cònsol de Narbona als jornals le Rappel de l'Aude e lo Républicain de Narbonne.

S'inscriguèt alara al tribunal de Narbona e son talent d'orador e la qualitat de sas intervencions lo portèron lèu a una posicion de tria.

En 1888 foguèt elegit conselhièr municipal de Narbona dins una lista d'aligança que barrejava radicals e socialistas. Pasmens de garrolhas entre eles provoquèron en 1889 la sortida dels elegits socialistas del Conselh municipal. Se faguèron tornarmai d'eleccions e Aldin foguèt pas elegit. Tot aquò cambièt radicalament en 1891 que la lista socialista passèt e qu'Aldin venguèt l'adjonch del cònsol. Venguèt cònsol en 1892, aprèp qu'Ernèst Ferrolh foguèsse fòrabandit e demorèt a aquesta foncion fins a 1894, an que Ferrolh poguèt recuperar la comuna. Venguèt adjonch del cònsol. A mai de tot aquò èra vicepresident del Conselh general. A las eleccions generalas dels 27 d'abril e 11 de mai de 1902 ensagèt de venir deputat de la 1èra circonscripcion de Narbona ja que son amic Ferrolh s'i tornava pas presentar. Foguèt elegit al segond torn e batèt un ancian Ministre.

Foguèt reelegit a las eleccions seguentas del 6 de mai 1906 e tornarmai lo 24 d'abril de 1910 e ganhèt a las eleccions fins a 1919 que la lista socialista fracassèt. Moriguèt dos ans mai tard, en 1921, a l'edat de 68 ans.