Eddy Merckx

Eddy Merckx

Informacions
Nom	Merckx
Prenom	Eddy
Escais	Lo Canibal
Data de naissença	17 de junh de 1945
País	Belgica
Equipa actuala	retirat
Tipe de correire	fòra categoria...

Eddy Merckx (Edouard Louis Joseph, Baron Merckx segon l'estat civil bèlga, nascut a Meensel-Kiezegem, Brabant, a l'èst de Lovaina lo 17 de junh de 1945) es un ciclista flamenc professional considerat per totòm, qu'es indenegable lo fach, coma lo melhor de l'istòria tota del ciclisme internacional.

La Carrièra

... en 1973...

Amb 525 victòrias al siu palmarès, ne deten lo recòrd absolut, que ganhèt totas las Classicas e Grands torns del calendièr, franc París-Tors e l'ara dispareguda Bordèu-París, 28 classicas e 11 grands Torns.

Designat 3 còps melhor esportiu del mond en 1969, 1971 e 1974, escaisnomat lo Canibal per jornalistas e adversaris, que li ne daissava el als autres sonque las micalhas del festin, aguèt pr'aquò un fum d'adversaris valents e valedors coma, e bèl primièr que primieràs, lo neerlandés Joop Zootemelk (6 còps lo siu segond, davant ganhar enfins lo Tour en 1980), lo francés de Savòia Bernard Thévenet, l'italian Felice Gimondi, l'espanhòl establit dins las Landas, al Mont, Luis Ocaña, lo siu conteiral flamenc Roger de Vlaminck dins las classicas, mai lo grand champion lemosin Raimond Polidor.

Se retirèt en 1978, aprèp mai de 15 ans de carrièra professionala, que la suspicion de dopatge existiguèt (amb de resultats atal, cossí ne seriá pogut èsser estat diferent?) mas ne foguèt pas jamai averada e provada, malgrat las campanhas de premsa orquestradas pels interèsses economics, financièrs, nacionals e esportius de las equipas dels sius adversaris principals.

Victorias màgers

... amb en Joop Zoetemelk en 1973...

D'efièch, trionfèt 5 còps dins lo Torn de França en 1969, 1970, 1972, 1973, 1974.

Idem lo Giro d'Italia, 1968, 1970, 1972, 1973, 1974.

Ne foguèt un còp (sonque...) venceire de la Vuelta a España o Torn d'Espanha en 1973.

Foguèt amai 3 còps campion del mond de ciclisme de l'espròva sus rota en 1967, 1971 e 1974.

Ganhèt 7 còps Milan-San Remo, en 1966, 1967, 1969, 1971, 1972, 1975 e 1976.

5 còps Lièja-Bastonha-Lièja en 1969, 1971, 1972, 1973 e 1975.3 còps París-Roubaix (lo ben nomenat Infèrn del nòrd...) en 1968, 1970 e 1973.

Idem 3 còps París-Niça (La corsa al solelh...) en 1969, 1970 e 1971, mai 3 Flèchas Valonas (1967, 1970, 1972), 2 còps la Ronde van Vlanderen (Torn de las Flandras) en 1969 e 1975, idem lo Giro di Lombardia (Torn de Lombardia) en 1971 e 1972.

Demest autras moltas e tantas victòrias sul circuit mondial.

Obtenguèt tot parièr 7 Super Prestige Pernod International, que designa lo melhor ciclista del mond, adereng, en 1969, 1970, 1971, 1972, 1973, 1974 e 1975.

Benlèu (amai de segur gaireben...) lo palmarès mai complèt e remirable de l'istòria tota de l'espòrt mondial, totas disciplinas mescladas.

Autres espets e recòrds

recòrd del mond de l'ora

Batèt tanben lo recòrd del mond de l'ora al velodròm de Ciutat de Mexic, en altitud, en 1972, amb una performància de 49,431 km.

Lo servarà pendent dotze ans.

... al Campionat del Mond de ciclime de 1974 a Canadà...

Amai de las siás 525 victòrias professionalas (333 fòra critèriums), comptèt moltas victòrias en amator, que la pus importanta ne foguèt lo Campionat del mond amator de ciclisme sus rota en 1964.

un fum d'autres recòrds

Deten tot parièr los recòrds del nombre màger de victòrias dins una sola sason (54) idem victòrias d'etapa dins lo Tour (34) idem las corsas classicas (28) idem dins una sola classica (7, la Milan-San Remo), e de victòrias dins los 3 grands Torns (11).

Deten enfins lo recòrd de 96 jorns passats amb lo maillot jaune sus las rotas del Tour de França.

Foguèt lo sol tanben a ganhar la meteissa annada los 3 malhòls distintius del Tour, çò es lo jaune, lo verd (correire mai regular o classament per punts) e lo de peses (de melhor escaladaire).

Lo demai de sa vida...

... L'usina de cicles de n' Eddy Merckx a Meise...

Maridat amb na Sabine Acou dempuèi lo 9 de decembre de 1967, aguèt una filha, Sabrina, e un filh, Axel, nascut lo 8 d'agost de 1972.
Venguèt correire professional de plan bon nivèl mas sempre entrepachat çaquelà per la reputacion e lo palmarès del papà.
Ciclista molt potent e complet, se ganhèt pr'aquò lo Campionat de Belgica sus rota en 2000, 1 etapa del Giro la meteissa annada e la medalha de bronze als Jòcs Olimpics d'Atenas en 2004.

Patiguèt Eddy d'un problèma grèu d'obesitat que sanèt gràcias a una operacion de reduccion de l'estomac...

Creèt una usina de cicles a Meise.

La siá modestia exemplara e tan remirabla ne foguèt pas sovent seguida per molts campionets que i aguèt.

Bibliografia

libres de n'Eddy Merckx en collaboracion

Eddy Merckx & Marc Jeuniau: Plus d'un tour dans mon sac Mes carnets de route 1972... Éditions Arts et Voyages 1972 (en francés)
... amb Pïerre Chany: Coureur cycliste... Colleccion Un Homme et son métier ed. Robert Laffont 1974 (idem)
... amb Pierre Depré: Ma chasse aux maillots rose, jaune, arc-en-ciel Mes carnets de route 1974... ed. Arts et Voyages id (id)
... amb Toon Claes... La passion du vélo... Roularta Books Roulers Belgica 2008 (id)

a perpaus d'Eddy Merckx

François Terbeen: Le phénomène Eddy Merckx et ses rivaux... cò Del Duca París 1971 (en francés)
Roger Bastide: Eddy Merckx cet inconnu... Marabout Belgica 1972 (idem)
Marc Jeuniau: Eddy Merckx l'homme du défi... Éditions Arts et Voyages 1977 (id)
Jean-Paul Ollivier: Eddy Merckx, la véritable histoire Éditions Glénat mai de 1996 (id)
Théo Mathy: Eddy Merckx, les tours de France d'un champion unique... Éditions Luc Pire mai de 2008 (id)

Documents audiovisuals

Joël Santoni: La course en tête, filme documentari (c) França 1974

Ligams extèrnes

Ligams videografics

[1]

- sus YouTube... mai de 1060 documents subre n' Eddy Merckx en picar coma clau Eddy Merckx

Nòtas & referéncias