Conjuracion deis Egaus
La Conjuracion deis Egaus es una temptativa de reversament dau Directòri menada, durant la Revolucion Francesa, per Gracchus Babeuf e lo movement deis « Egaus ». Lo projècte foguèt aisament reprimit per lo govèrn francés en causa d'un traïment e lei caps principaus foguèron condamnats a mòrt ò exiliats. Pasmens, aqueu complòt es conegut coma la premiera temptativa de presa dau poder per un movement d'inspiracion comunista.
Causas[modificar | Modificar lo còdi]
La conjuracion foguèt organizada per Gracchus Babeuf (1760-1797) e sei partisans, principalament recampats dins lo club dau Panteon. Eissit de l'agitacion revolucionària, aqueu movement èra en favor d'una reforma radicala de la societat que prefigura lo comunisme dau sègle XIX. Per ela, èra necessari d'abolir la proprietat privada e de proclamar una republica egalitarista. Un jornau, lo Tribun du peuple, li permetèt de difusar seis idèas. Puei, en 1796, de trèbols populars, causats per l'aumentacion dei pretz, donèron l'idèa ais « Egaus » d'organizar una insureccion còntra lo Directòri.
Debanament[modificar | Modificar lo còdi]
Lo projècte d'insureccion foguèt imaginat durant l'ivèrn 1795-1796 e lei partisans de Babeuf recebèron pauc a pauc l'ajuda de jacobins democratas coma André Amar (1755-1816). Una comitat d'uech personas foguèt creat per dirigir l'operacion (Babeuf, Buonarroti, Darthé, Debon, Maréchal, Lepeletier, Antonelle e Grisel). Lo contèxte èra favorable en causa de la famina presenta dins plusors vilas importantas e d'una aumentacion de l'agitacion reialista[1]. Gràcias a l'influéncia dau Tribun du peuple, lei conjurats esperavan obtenir lo sostèn dei massas popularas.
Pasmens, lo Directòri foguèt avertit dau projècte per Grisel. Ordonèt ansin l'arrestacion dei caps de la conspiracion lo 10 de mai de 1796. Puei, reprimiguèt sensa dificultat una temptativa de mutinariá dau camp de Grenelle dins la nuech dau 9 au 10 de setembre (131 presoniers, 30 fusilhats). Enfin, a la demanda de Lazare Carnot, lei menaires deis « Egaus » foguèron jutjats e Gracchus Babeuf e Darthé foguèron condamnats a mòrt en mai de 1797.
Influéncia[modificar | Modificar lo còdi]
La conjuracion deis Egaus es la premiera temptativa d'aplicar d'idèas comunistas dins la realitat. Aquò marca ansin son intrada dins la vida politica europèa. De mai, gràcias a l'òbra de Buonarroti, leis idèas egalitaristas de Babeuf se difusèron dins lo movement republican. L'idèa d'una dictatuta revolucionària provisòria per abolir la proprietat privada influencièt tanben fòrça lei trabalhs de pensaires coma Auguste Blanqui (1805-1881), Karl Marx (1818-1883) e Lenin (1870-1924).
Annèxas[modificar | Modificar lo còdi]
Liames intèrnes[modificar | Modificar lo còdi]
Bibliografia[modificar | Modificar lo còdi]
- (fr) Jean-Marc Schiappa, Gracchus Babeuf, avec les Égaux, Éditions ouvrières, coll. « La part des hommes », 1991.