Centre Interregional de Desvolopament de l'Occitan

Un article de Wikipèdia, l'enciclopèdia liura.
Salta a la navegació Salta a la cerca
LO CIRDÒC a Besièrs

Lo Centre Interregional de Desvolopament de l'Occitan, o CIRDÒC, situat dins lo centre de Besièrs, es a l'encòp la mediatèca d'Occitània e un esplech de promocion de l'identitat occitana.

Istòria[modificar | modificar la font]

Lo CIRDÒC es l'eiretièr del Centre Internacional de Documentacion Occitana que visquèt fins a 1995. Espeliguèt en 1999 en seguida d'un acòrdi entre la region de Lengadòc-Rosselhon e la comuna de Besièrs pr'amor d'aparar e de far mai conéisser las colleccions del CIDO qu'èran estadas balhadas a la Vila de Besièrs en 1995). Creèron un establiment public, possiblament lo primièr per una lenga dicha regionala en França, amb un sindicat mixt dobèrt per lo capitanejar. En 2011 lo Centre lancèt un portal numeric, Occitanica.eu, ont s'i pòdon consultar de nombroses libres e documents de la bibliotèca.

Lo primièr director del Centre foguèt Danís Mallet, seguit puèi per Felip Hammel de 2007 a 2012, e actualament son director es Benjamin Assié, que n'èra conservador abans.

Mission del CIRDÒC[modificar | modificar la font]

Aqueste fons documentari, unic al mond dins lo domeni occitan, constituís la sola bibliotèca exclusivament consagrada a una lenga e a una cultura regionala. Aqueste patrimòni, enriquit d'un biais permanent a travèrs una politica d’aquisicions renforçada, a per tòca d’èsser una memòria viventa mesa a la disposicion de totes, grand public, estudiants, escolans, simples curioses o cercaires del mond entièr.

Granda mediatèca e pòl cultural consacrat a la lenga e la cultura occitanas, Lo CIRDÒC met a disposicion dels lectors un fons documentari d'environ 70 000 obratges (libres, usuals, jornals, afichas, DVDs, CDs,...). Sa mission primièra es de completar sas colleccions, de n'assegurar la salvagàrdia e de las metre a disposicion de tot public dins las condicions melhoras possiblas.

Lo CIRDÒC venguèt Pòl associat a la Bibliotèca Nacionala de França en 2006. Aquesta li a reconegut la qualitat d'establiment especializat dins lo domeni occitan. La convencion que lo liga amb la BNF es cosignada per la Bibliotèca municipala de vocacion regionala de Montpelhièr (BMVR) e aqueles dos establiments de la region de Lengadòc-Rosselhon constituisson lo Pòl associat a la BNF. Aqueste pòl es encargat de publicar una bibliografia occitana, correnta (annada per annada) e retrospectiva (en partent d'uèi e en remontant fins als primièrs documents dins aquesta lenga). La primièra bibliografia occitana es pareguda en edicion papièr en junh de 2009.

Parallèlament, Lo CIRDÒC s'es engatjat a referenciar totes los fonses occitans e jòga lo ròtle de pilòt de malhum documentari per la lenga d'òc. Es perqué òm ditz que Lo CIRDÒC fa per la lenga occitana çò que la Bibliotèca Nacionala de França fa per la lenga francesa. Aqueste establiment public a doncas per objècte de metre en plaça la granda memòria de la civilizacion occitana que posèt sas originas dins la poesia cortesa inventada pels trobadors al sègle XII. Dempuèi 1000 ans, los autors de lenga occitana produson una literatura de qualitat.

Lo CIRDÒC jòga tanben un ròtle de mediator cultural occitan. Sosten o coorganiza de manifestacions culturalas en son sen mas tanben sus l'ensemble del territòri occitan. Acompanha las politicas territorialas, met en valor la creacion e la difusion artistica e culturala occitana, e prepausa son expertesa per d'unes projèctes que dintran dins son camp d'accion. Per facilitar l'accès als tresaurs culturals que consèrva e seguir l'actualitat de la lenga, Lo CIRDÒC prepausa dempuèi 2009 un portal d'Internet que se ditz La Pòrta d'òc ([1]).

Lo CIRDÒC es tanben sòci del Congrès permanent de la lenga occitana, amb lo qual mena un projècte de basa lexicala istorica qu'a per objectiu d'èstre un diccionari scientific descriptiu de la lenga occitana e tanben Bibli'Òc, una bibliografia dels utís documentaris per aprene l'occitan.

Occitanica, mediatèca virtuala[modificar | modificar la font]

En octobre de 2011, lo CIRDÒC lancèt sa "mediatèca enciclopedica" sus Internet: Occitanica que presenta de documents plan divèrses, dempuèi de libres numerizats fins a de documentaris.

Ligams extèrnes[modificar | modificar la font]