Carri Fiat L6/40

Lo carri Fiat L6/40 es un carri leugier italian de la Segonda Guèrra Mondiala intrat en servici en 1941. Armat d'un canon de 20 mm e d'una mitralhièra de 8 mm, èra un veïcul fòrça leugier d'una massa de 6,8 t e d'un blindatge de 6 a 40 mm. Un motor de 70 cv permetiá d'agantar una velocitat de 42 km/h. Lo nombre d'exemplaris produchs es estimat entre 253 e 500 e lo Fiat L6/40 participèt ais operacions dins lei Balcans, sus lo frònt sovietic, en Africa dau Nòrd e en Sicília.

Lo Fiat L6/40 aguèt lei meteis problemas que lo rèsta de la produccion de carris italians. En mai d'una produccion insufisenta, èra obsolèt tre sa sortida en causa de la durada tròp lònga de sa concepcion^[1]. Per agravar aquelei defauts, la manca de carris dins l'armada italiana menèt a una utilizacion dau L6/40 coma carri mejan. Òr, èra vulnerable a la quasi totalitat deis armaments anticarri e son canon èra unicament eficaç còntra de blindats fòrça leugiers. Après la capitulacion italiana, leis exemplaris capturats per la Wehrmacht foguèron donc mandats dins lei Balcans per equipar d'unitats encargadas de luchar còntra de partisans.