Campanha de Sicília

Un article de Wikipèdia, l'enciclopèdia liura.
Fotografia de soudats britanics avançant dins una carriera de Catània.
Fotografia de l'explosion dau naviri de transpòrt USS Robert Rowan tocat per l'aviacion alemanda au larg de Gela.

La campanha de Sicília (nom de còdi aliat Operacion Husky) se debanèt dins lo corrent de la Segonda Guèrra Mondiala dau 9 de julhet au 17 d'aost de 1943. Foguèt la consequéncia de l'invasion aliada (160 000 òmes[1]) que son nombre aumentèt pauc a pauc a 467 000) de Sicília defenduda per l'armada italiana (230 000 òmes) renfòrçada de plusors divisions alemandas (40 000 òmes inicialament e 90 000 au maximom).

Lo desbarcament dei fòrças aliadas, especialament estatsunidencas, aguèt luòc dins de condicions malaisadas en causa d'una meteo desfavorabla e de còntra-ofensivas alemandas. La combativitat dei formacions blindadas alemandas foguèt ansin un problema major per leis Aliats durant la totalitat de la campanha. En revènge, franc dei divisions Napoli e Livorno, lei soudats italians resistèron gaire ais ofensivas aliadas. Ansin, gràcias a sa superioritat numerica e materiala, leis Aliats capitèron pauc a pauc d'avançar vèrs lei pòchas defensivas establidas a l'entorn dei pòrts principaus de l'illa. Blocats, una partida dei fòrças de l'Axe i foguèt alora obligadas de capitular mai leis Alemands poguèron evacuar la màger part de sei divisions.

Dins lo corrent de la batalha, leis Aliats perdiguèron 24 000 tuats e bleçats (13 000 per lei Britanics, 9 000 per leis Estatsunidencs, 2 400 per lei Canadencs) còntra 169 000 per l'Axe (29 000 tuats ò bleçats e 120 000 presoniers). En mai d'aquò, la capitada dau desbarcament aliat en Sicília accelerèt la destitucion de Benito Mussolini que foguèt destituit lo 24 de julhet de 1943 per lo Grand Conseu dau faissisme.

Liames intèrnes[modificar | Modificar lo còdi]

Bibliografia[modificar | Modificar lo còdi]

Nòtas e referéncias[modificar | Modificar lo còdi]

  1. Lo Reiaume Unit e leis Estats Units d'America formavan la màger part dei tropas aliadas. Pasmens, Canadà, Austràlia, Sud-Africa e la França Liura engatjèron tanben plusors unitats.