Benauja

Un article de Wikipèdia, l'enciclopèdia liura.
Salta a la navegació Salta a la cerca

La Benauja es una region de l'Entre Duas Mars, hasent partida de l'extrème oèst dau Bordalés, en Gironda. Hèi partida de Gasconha pusque s'i parla tradicionalament una fòrma de gascon. La vila principala de Benauja es Cadilhac ; Targon, Sent Macari e Langoiran ne'n hèsen tanben partida. A l'entrada nòrd de Sent Macari existís d'alhurs una "pòrta de Benauja".

L'origina dau nom, ce disen certèns, es "ben auge" (qu'i auge dau ben) mès quò's una explicacion fantasiosa, poiria provenir de vindaudia ('país blanc'). La Benauja estut un comtat, dont lo shèite èra a Arbís, au castèth dit de Benauja.

La Benauja, a part la valèia de Garona, es una region hòrt rurala, dont l'activitat essenciala es la viticultura, apelacions Senta Crotz, Cadilhac, Lopiac, Còstas de Bordèu, Prumèiras Còstas de Bordèu, Entre Duas Mars. Existissen aperitius a basa de vin, lo Bròc (Sent German de Grava), la Benaujana (plantas de Salabrunau) ; amèi una buvenda a basa de grata-quiu, produisuda au Pian. Una auta especialitat, anuit quasi dispareishuda, es la cerisa, o lo guindolh dens sa version sauvatja. Una hèsta que se desrotla a Escossan au debut dau mes de junh a tornat botar aquesta especialitat au gost dau jorn. En efèit, nombrós cerisèirs èran plantats aus caps de las règas ; esturen darrigats per perméter l'extension de la vinha, mès ne'n tròban encara quauques-uns.