Batalha de la Mar Jauna
La batalha de la Mar Jauna es una batalha navala que se debanèt lo 10 d'aost de 1904 durant la Guèrra Russojaponesa. Opausèt la flòta japonesa comandada per leis amiraus Togo Heihachiro e Dewa Shigeto (62 naviris[1]) a una esquadra russa dirigida per l'amirau Wilhelm Withöft (24 naviris[2]). L'objectiu dei Rus èra de rompre lo blocus de Port-Arthur per permetre a sei naviris de jonhér l'esquadra russa de Vladivostok en vista de constituïr una flòta pron poderosa per contestar la dominacion navala nipona[3]. L'objectiu dei Japonés èra de blocar l'esquadra russa.
Lei Rus comencèron sa sortida lo 10 d'aost a 4h30 sensa cercar lo combat en causa de la superioritat numerica de son adversari. A 11h30, intrèt en contacte amb lei fòrças japonesas qu'asseguravan lo blocus au larg de Shandong. Pasmens, lei Japonés laissèron passar lei naviris per blocar tota retirada vèrs Port-Arthur sensa comprendre lo projècte de sortida vèrs Vladivostok de l'esquadra russa. Dins aquò, après quauqueis oras, la natura dau plan russa foguèt descubèrta per Togo Heihachiro. Après una perseguida, lo combat comencèt donc vèrs 17h45. Vèrs 18h, un obús tuèt l'amirau Withöft e plusors oficiers superiors. Aquò trebolèt lo comandament rus e lei naviris rus se dispersèron. Una partida poguèt s'entornar a Port-Arthur mai 5 naviris deguèron se refugiar dins lei pòrts de Tsingtao e de Saigon onte foguèron internats.
Se lei pèrdas foguèron relativament equilibradas (343 tuats per lei Rus còntra 224 per lei Japonés), la batalha s'acabèt per una victòria importanta per lei Japonés. D'efiech, l'esquadra russa poguèt pas rompre lo blocus e lei naviris internats èran perduts per la seguida deis operacions. De mai, lei Rus èran pas capables de reparar lei naviris presents a Port-Arthur. Lei Japonés poguèron donc aisament blocar lo rèsta de l'esquadra russa dau Pacific. Foguèron egalament en mesura de reparar sei naviris, çò que foguèt fòrça important per la batalha de Tsushima que veguèt la victòria definitiva de Tòquio dins lo conflicte.
Liames intèrnes[modificar | Modificar lo còdi]
Bibliografia[modificar | Modificar lo còdi]
- (fr) Rotem Kowner, Dictionnaire historique de la guerre russo-japonaise, Scarecrow, 2006.
- (fr) Ian Nish, Les origines de la guerre russo-japonaise, Longman, 1985.
- (fr) F. R. Sedwick, La guerre russo-japonaise, The Macmillan Company, 1909.
Nòtas e referéncias[modificar | Modificar lo còdi]
- ↑ 4 cuirassats, 2 crosaires blindats, 8 crosaires, 18 destroièrs e 30 torpilhaires.
- ↑ 6 cuirassats, 4 crosaires e 14 destroièrs.
- ↑ L'amirau Wilhelm Withöft que menèt la sortida russa èra opausat a aqueu plan. Per eu e seis oficiers, èra pus util de gardar l'esquadra dins lo pòrt de Port-Arthur per sostenir la defensa de la vila gràcias ai pèças d'artilhariá dei naviris. Pasmens, l'Amirautat russa ordonèt lo contrari.