Batalha de Tsushima

Un article de Wikipèdia, l'enciclopèdia liura.
Anar a : navigacion, Recercar

La batalha de Tsushima se debanèt lei 27 e 28 de mai de 1905 entre lei flòtas russa e japonesa durant la Guèrra Russojaponesa (1904-1905). S'acabèt per la destruccion ò la capitulacion de la màger part dei naviris rus. Après aquela revirada, lo govèrn rus deguèt acceptar de negociar la fin de la guèrra que s'acabèt per una victòria de Japon.

Après sei desfachas terrèstras en Manchoria, la flòta russa mandada en Asia èra la darriera resèrva militara importanta de Russia. Compausada principalament deis unitats de l'esquadra de la Mar Baltica, gropava 28 naviris modèrnes e vièlhs dirigits per l'amirau Zinovy Rozhestvensky. Seis unitats principalas èran 8 cuirassats, 3 cuirassats costiers, 8 crosaires e 9 destroièrs. En fàcia, la flòta japonesa de l'amirau Togo Heihachiro alinhava 4 cuirassats, 27 crosaires, 21 destroièrs e 37 torpilhaires ò naviris leugiers. Aqueleis unitats èran generalament modèrnas.

Gràcias a de mejans de comunicacion melhors e a una velocitat superiora, lei Japonés poguèron localizar la flòta russa e organizar una ataca a partir d'una posicion favorabla. De mai, la cadéncia de tir japonesa èra superiora a aquela dei naviris rus qu'èran equipats principalament de canons pesucs lents. L'equipament dei naviris japonés (telemètre) e l'utilizacion d'obús entraïnant un desgatjament important de fum donèron tanben una precision melhora ai tirs japonés. Enfin, lei falhas dins lo comandament rus, que son cap donèt per òrdre unic de rompre lei linhas japonesas fins au pòrt de Vladivostok, agravèron mai lei dificultats de la flòta dau tsar. Lei cuirassats rus pus modèrnes foguèron ansin rapidament neutralizats e a la fin de la premiera jornada, unei naviris rus importants èran ja destruchs e lo rèsta èra estat obligat de se dispersar. Aprofichant sa victòria, lei Japonés ataquèron tanben d'autreis esquadras russas situadas dins la region per defendre lei costats. L'endemans, Rozhestvensky capitulèt rapidament e divèrsei naviris rus isolats foguèron aprefondats, capturats ò obligats de s'enfonsar volontàriament. Solament tres naviris rus capitèron d'agantar Vladivostok e quatre autrei lo pòrt estatsunidenc de Manilha (Filipinas).

A la fin de la batalha, lei pèrdas russas èran de 21 naviris aprefondats, 7 capturats e 6 sabordats. Aperaquí 4 380 marins èran estats tuats e 5 917 capturats, compres l'amirau Rozhestvensky. De son caire, la flòta japonesa perdiguèt tres torpilhaires, 117 tuats e 583 bleçats. Lo prestigi internacionau e interior dau govèrn rus èra tocat. Lo país deguèt reconóisser sa desfacha còntra Japon (tractat de París) e faciar de tensions intèrnas qu'anavan entraïnar la Revolucion Russa de 1905.

Liames intèrnes[modificar | modificar la font]

Bibliografia[modificar | modificar la font]

Nòtas e referéncias[modificar | modificar la font]