Batalha de l'Atlantic (1939-1945)
.jpg)
La batalha de l'Atlantic designèt l'ensems deis operacions navalas que se debanèron durant la Segonda Guèrra Mondiala dins l'Ocean Atlantic. Conoguèt d'extension en Mar Mediterranèa, dins l'Ocean Indian e dins l'Ocean Artic. Opausèt principalament lei sosmarins alemands e italians ai naviris d'escòrta e ai avions antisosmarins aliats. L'objectiu de l'Axe èra de realizar lo blocus deis Illas Britanicas e d'empachar lo passatge dei convòis americans a destinacion d'Euròpa.
A l'origina de progrès tecnics importants en matèria de deteccion e de concepcion dei naviris, s'acabèt per una victòria aliada car lei sosmarins alemands èran pas pron nombrós per atacar totei lei convòis aliats (au minimom, 74% dei convòis passèron sensa subir de pèrdas). De mai, après l'intrada en guèrra deis Estats Units d'America, leis Aliats podián remplaçar aisament lei pèrdas subidas tot en aumentant mai lo nombre de sei cargos. Enfin, a partir de 1943, la generalizacion dau sonar permetèt ais Aliats tracar pus eficaçament lei sosmarins. Pasmens, aperaquí 3 500 cargos e 175 naviris de guèrra aliats foguèron aprefondats entraïnant la mòrt d'au mens 45 000 marins. En fàcia, 783 sosmarins foguèron destruchs causant la mòrt de 30 000 militars e la captura de 5 000 presoniers.