Baioneta

Fotografia de divèrsei modèls de baionetas estatsunidencas.

Una baioneta es una arma blanca, destinada au combat raprochat, qu'es concebuda per s'adaptar au canon d'un fusiu.

Lo tèrme de baioneta remonta a la fin dau sègle XVI, mas se sap pas precisament se a aquesta epòca lei baionetas èran de cotèus que se podián fixar au cap daus fusius, o simplament un tipe de cotèu. Per exemple, Lo Diccionari Cotgrave en 1611 descriu la baioneta coma "una mena de pichona daga de pòcha plata,; o un grand cotèu per penjar a la cintura". Pèire Borèl escriu en 1655 qu'una mena de long cotèu sonat baioneta èra fargat a Baiona mas baila pas pus de precisions. Foguèt donc probable inventada en Occitània durant la premiera mitat dau sègle XVII avans d'èsser oficialament adoptada en 1671. Coma lei fusius dau periòde avián una fisabilitat limitada e podián pas èsser tornats cargar rapidament, aquela arma èra un complement fòrça util per lei fantassins. Son usatge se generalizèt ais autreis armadas europèas e remplacèt aqueu dei picas.

L'utilitat vertadiera de la baioneta comencèt de declinar a partir de la segonda mitat dau sègle XIX. Per exemple, la baioneta foguèt probable a l'origina de solament 1% dei pèrdas enregistradas durant la Guèrra de Secession (1861-1865). L'aumentacion de la cadença de tir e de la portada eficaça dei fusius foguèron largament a l'origina d'aqueu declin. Dins aquò, la baioneta es pas estada abandonada ambé lo desvolopament de lamas novèlas capablas, per exemple, de copar de barbelats. De mai, dins certanei circonstàncias, l'usatge de la baioneta demòra interessant. Ansin, l'armada francesa l'utilizèt en 1995 en Iogoslavia e l'armada britanica en Afganistan durant leis ans 2000-2010.

Liames intèrnes

• Fusiu.
• Infantariá.
• Pica.