Carri Fiat M15/42
Lo carri Fiat M15/42 es un carri mejan de la Segonda Guèrra Mondiala concebut a partir dei carris Fiat M13/40 e M14/41. Èra dotat d'un motor pus poderós e de filtres pus eficaç per l'adaptar ai condicions duras dau clima saharian. Gardèt un canon de 47 mm coma armament principau e recebèt tres mitralhièras de 8 mm coma armament segondari. Èra capable d'agantar una velocitat de 40 km/h.
Lo M15/42 deviá corregir lei defauts de sei predecessors mai aviá de problemas identics : durada tròp importanta entre sa concepcion e son intrada en servici, simplificat tecnica per l'adaptar a l'otís industriau italian, armament tròp feble, blindatge riblat e tròp leugier, etc. Èra ansin obsolèt tre son intrada en servici au sen de la division Ariete II[1]. La produccion comencèt tardivament e lo nombre d'exemplaris produchs es pauc clar amb de chifras anant de 90 a 333 segon lei fònts. Lo carri participèt ai combats entre Italians e Alemands per lo contraròtle de Roma après la capitulacion italiana dau 3 de setembre de 1943. Alemanha capturèt plusors desenaus exemplaris e perseguiguèt la produccion dins lo nòrd d'Itàlia. La Wehrmacht l'utilizèt en Iogoslavia per equipar leis unitats encargadas de combatre lei partisans[2].
Annèxas[modificar | Modificar lo còdi]
Bibliografia[modificar | Modificar lo còdi]
- (en) Filippo Cappellano, Pier Paolo Battistelli, Italian Medium Tanks: 1939-45, Osprey Publishing, 2012.
Nòtas e referéncias[modificar | Modificar lo còdi]
- ↑ En mai de problemas grèus coma lo blindatge riblat, sei caracteristicas correspondián a aquelei dei carris leugiers deis autrei poissanças majoras de la Segonda Guèrra Mondiala.
- ↑ Au mens 85 exemplaris èran en servici en decembre de 1944.