Zara Yakub

Un article de Wikipèdia, l'enciclopèdia liura.
Salta a la navegació Salta a la cerca

Zara Yakub (1399 - 28 d'aost de 1468) foguèt lo negus de l'Empèri d'Etiopia de 1434 a 1468. Succediguèt a son nebòt Amda Iyasus (1433-1434) e foguèt remplaçat per Baeda Maryam Ièr (1468-1478).

Son rèine marquèt l'apogèu de l'Etiopia medievala. Arribat au poder après un periòde d'instabilitat au sen de la dinastia salomoniana, renforcèt premier sa legitimitat en organizant son coronament dins la vila istorica d'Aksum e demorèt fòrça maufisant fins a sa mòrt per s'aparar còntra lei complòts organizats per l'aristocracia. Se preocupèt tanben d'establir de relacions fòrtas ambé la Glèisa Etiopiana. Per aquò, fondèt plusors monastèris, en particular aqueu de Debre Metmaq (1441) e organizèt mai d'una campanha de conversion dei populacions paganas de Godjam e de Damot. Enfin, capitèt de reglar en 1450 la crisi grèva que minava lo clergat etiopian dempuei la publicacion dei tèsis de l'abat Ewostatewos (autonòmia pus larga de la Glèisa, interpretacion pus estricta de la Bíblia, respèct dau sabbat en plaça dau repaus dau dimènge... etc.) ambé l'adopcion d'una tiera de mesuras inspiradas per l'abat coma la reconóissença dau sabbat. Puei, capitèt d'impausar aquelei sei decisions ais elements pus conservadors de la Glèisa. Enfin, luchèt còntra la mascariá e adoptèt de definicions pus precisas dei rites e de la liturgia etiopians.

Regardant la politica estrangiera, contunièt lei guèrras acomençadas per sei predecessors còntra lei principats musulmans de la region. En particular, bateguèt lo sultan d'Ifat que foguèt tuat sus lo prat batalhier en 1445 e installèt de colonias militaras en Eritrèa. A sa mòrt, l'Empèri s'estendiá tornarmai fins a la Mar Roja, lei principats musulmans d'Ifat, de Fatagar, de Dawaro e de Bale èran venguts sei vassaus e Adel deviá pagar un tribut important.

Liames intèrnes[modificar | modificar la font]

Bibliografia[modificar | modificar la font]

Nòtas e referéncias[modificar | modificar la font]