ZSU-23-4
Lo ZSU-23-4 Shilka es un canon antiaerian automotor desvolopat durant leis ans 1950 per l'URSS per remplaçar lo ZSU-57-2. Construch sus la basa dau carri leugier PT-76, es destinat a l'acompanhament e a la proteccion deis unitats motorizadas e blindadas. Per aquò, es armat de quatre canons automatics de 23 mm dirigits per radar. Es protegit per un blindatge feble mai aquò èra pas un problema vertadier car lo ZSU-23-4 es pas destinat au combat dirècte còntra d'autrei veïculs.
La produccion comencèt en 1964 e s'acabèt en 1982. Aperaquí 6 500 exemplaris foguèron fabricats. Un tèrç foguèt exportat vèrs de país aliats per lei Sovietics. Lo ZSU-23-4 aguèt un succès important durant la Guèrra de Kippur au sen de l'armada egipciana[1]. Pasmens, leis Israelians s'adaptèron e l'ataquèron amb d'armas de portada pus lònga. Durant la Guèrra de Kuwait (1990-1991), lei pilòts occidentaus adoptèron de tacticas similaras. Lei Sovietics utilizèron de ZSU-23-4 en Afganistan per sostenir d'unitats engatjadas dins de combats terrèstres. Après la Guèrra Freja, una tala utilizacion foguèt egalament observada en Chechenia e en Siria, especialament per luchar còntra lei tiraires d'elèit durant lei combats urbans.
Totjorn considerat coma una menaça seriosa per leis aeronaus modèrnes, compres leis avions de combat, lo ZSU-23-4 èra encara en servici dins un trentenau de país en 2020.
Liames intèrnes[modificar | Modificar lo còdi]
Bibliografia[modificar | Modificar lo còdi]
- (en) Mike Guardia, Self-Propelled Anti-Aircraft Guns of the Soviet Union, t. 222, Osprey Publishing, coll. « New Vanguard », 2015.
- (en) Steven J. Zaloga, ZSU-23-4 Shilka & Soviet Air Defense Gun Vehicles, Concord, 1993.