Xavier de Forviera
Xavier de Forviera (nom vertadier Aubèrt Rius; en grafia mistralenca Savié de Fourviero, Aubert Riéu; en francés Xavier de Fourvière[s], Albert Rieux) (*Robion, Provença, 5 de febrier de 1853 — †Robion, 27 d'octòbre de 1912) foguèt un eclesiastic occitan e a l'encòp un filosòf, un lingüista e un escrivan. Aperteniá a l'òrdre dei premostrats.
Biografia
[modificar | modificar lo còdi]Xavier de Forviera nasquèt a Robion en 1853. Son paire èra oficier de santat e sa maire, Terèsa Enard, veniá d'un encastre rurau. Quand faguèt sei 11 ans, en 1864, intrèt au pichòt seminari d'Avinhon. Quand arribèt ai 15, descobriguèt l'òbra màger de Frederic Mistral, Mirèlha, que marquèt prefondament son esperit e lo deviá menar devèrs l'expression en provençau. Intrèt a l'Abadiá de Sant Miquèu de Frigolet lo 12 de mai de 1874 ont prenguèt lo nom de Fraire Maria Xavier; e quand prononcièt sei vots perpetuaus, lo 10 de novembre de 1878, decidiguèt de s'apelar Xavier de Forviera.
L'exili en Anglatèrra
[modificar | modificar lo còdi]En aplicacion de la lei Emile Combes, lo 15 d'abriu de 1903, foguèron expulsats lei religiós de l'Abadiá de Frigolet. Una part considerabla d'aquelei se refugièron en Belgica, a Dinant, que i restaurèron l'Abadiá de Nòstra Dòna de Leffe. Pasmens lo paire Xavier de Forviera, en seguida d'una demanda de sei superiors, se n'anèt en Anglatèrra e venguèt prior dau Priorat d'Storrington (Sussex), un ostau que l'Abadiá de Frigolet l'aviá fondat en 1882. Demorèt en Anglatèrra fins en 1912 quand foguèt victima d'una ataca cerebrala dins la glèisa francesa de Londres. Maugrat aquela ataca, trobèt la fòrça de compausar çò que seriá sa darriera òbra: Sus lo lindau de l'Eternitat.
La mòrt dau prior
[modificar | modificar lo còdi]
En seguida d'aquela ataca, lo prior d'Storrington tornèt a Robion lo 14 de setembre de 1912. Se moriguèt dins son ostau quauquei mes puei, lo 27 d'octòbre de 1912.
Òbras
[modificar | modificar lo còdi]- Grammaire Provençale (1899)
- Lo Pichòt Tresaur (1902) <Lou Pichot Tresor>, Dictionnaire provençal-français et français-provençal