Taksin
Taksin (17 d'abriu de 1734 - 6 d'abriu de 1782) foguèt un generau e un rèi de Siam que reinèt a partir de Thonduri, a l'oèst de Bangkòk, de 1767 a 1782. Se proclamèt rèi après la destruccion d'Ayuthia per lei Birmans en 1767 e foguèt reversat per un de sei subordenats que venguèt rèi sota lo nom de Rama Ièr (1782-1809). Es considerat coma un dei sobeirans pus importants de l'istòria tai e lo jorn de son coronament, lo 28 de decembre, es uei un jorn nacionau d'omenatge a sa memòria en Tailàndia.
Fiu d'un foncionari de l'adminstracion siamesa, venguèt governador de províncias e participèt a la defensa dau reiaume après lo començament de l'invasion birmana de 1764. Participèt a la defensa d'Ayuthia e capitèt de s'escapar amb una pichona armada avans l'afondrament definitiu de la capitala tai lo 7 d'abriu de 1767. Dins un contèxte de fragmentacion politic de Siam, prenguèt lo contraròtle dau litorau orientau. Una brèva campanha dins aquela region li permetèt de prendre possession d'un important arsenau, d'una flòta e de recebre lei servicis de plusors oficiers. Lo 7 de novembre, conquistèt la vila de Thonburi que venguèt sa capitala e infligiguèt una desfacha ai Birmans que marquèt l'acomençament de la reconquista de Siam. Lo 28 de decembre de 1768, i foguèt coronat rèi de Siam. Puei, fins a 1778, menèt una tiera de campanhas militaras que li permetèron de rebutar leis armadas birmanas, de restaurar l'influéncia tai en Laos e en Cambòtja e d'èsser reconegut coma rèi legitim per Vietnam e China. En parallèl, restaurèt l'administracion, l'economia e la vida religiosa dau país. Pasmens, perdiguèt la rason a la fin de son rèine, benlèu tre 1781[1]. En març de 1782, foguèt donc declarat fòl, reversat per un còp d'estat e rapidament executat. Lei rebèls laissèron lo poder au generau Chao Phraya Chakri que venguèt rèi e qu'es de còps considerat coma l'organizator dau còp d'estat.