Roqueta (arma)
Una roqueta es un projectil militar mogut per un motor fusada que pòu dispausar d'un sistèma de guidatge. Intermediari entre l'obús e lo missil, es accelerat durant la premiera partida de sa trajectòria per son propulsor avans acabar son vòl coma un obús.
Lo concèpte foguèt inventat per lei Chinés au sègle XII mai apareguèt, benlèu d'un biais independent, en Euròpa e en Índia quauquei sègles pus tard. De modèls foguèron integrats per plusors armadas durant lei guèrras indianas dau sègle XVIII ò durant lei Guèrras Napoleonencas. Pasmens, sa premiera utilizacion massisa aguèt luòc durant la Segonda Guèrra Mondiala amb l'invencion dau lança-roquetas multiple per lei Sovietics e la concepcion d'avions d'ataca au sòu armats de desenaus de roquetas per leis Aliats. A la fin de la guèrra, leis Alemands imaginèron tanben de roquetas destinadas au combat aerian.
Uei, la roqueta demòra un projectil frequentament utilizat per lei lança-roquetas multiples, per leis armas destinadas a la lucha anticarri e per certanei sistèmas antiaerians. Plusors modèls recents son desenant equipats de sistèmas de guidatge que permèton de corregir lor trajectòria.