Retiro (Buenos Aires)

Un article de Wikipèdia, l'enciclopèdia liura.
Anar a : navigacion, Recercar
Emplaçament de Retiro dens lo plan de Buenos Aires
... Monument au generau José de San Martín suber la plaça San Martín

Retiro qu’ei un quartièr de Buenos Aires limitat peus autes quartièrs de San Nicolàs e la Recoleta e tanben per l’arriu de la Plata. Retiro que gavida lo pòrt de Buenos Aires e qu’ei lo punt de depart deu Buquebus (lo vaishèth bus) qui religa Buenos Aires e la Republica Orientau d’Uruguai.

Retiro qu’ei tanben lo punt de depart deus autocars qui religan Buenos Aires e totas las províncias e qui quitan la capitau despuish l’Estacion d’Omnibus de Retiro qui costeja lo quartièr de casèras praubas conegut com la Villa 31.

A ras deu pòrt de l’Estacion d’Omnibus, Retiro que possedeish tanben ua gara deu camin de hèr situada de cara a la tor balhada a la debuta deu sègle XX per la comunautat britanica en commemoracion deu centenari de l'independéncia e coneguda com la Tor Monumentau (ancianament Tor deus Anglés avant la Guèrra de las Malvinas en 1982).

Monument deus sordats caduts dens las Islas Malvinas

Lo monument aus sordats caduts durant aqueth conflicte que’s troba justament pròche de la Tor, suber la plaça San Martín bordada peu famós gratacèu Kavanagh inaugurat en 1936 e qui èra alavetz, dab lo son 120 m de hautor, bastiment edificat en beton armat lo mei haut d'America deu Sud.

Qu’ei a l’endret on e’s troba uei la plaça San Martín que ho bastit durant lo sègle XVIII un ostau estremat de la ciutat e qui, per aquesta rason, b’èra aperat El Retiro (puish qu’èra retirat en dehòra deu center de Buenos Aires). Lo lòc que vadó camp batalhèr durant las duas invasions anglesas de 1806 e de 1807. En 1812, durant la guèrra d’independéncia, las arenas qui ocupavan la plaça qu’arcuelhón lo regiment de granadièrs deu generau José de San Martín. Arron, n’avón pas mei cap rason d’existir puish qu’Argentina, en signe de rejècte de cap a Espanha, qu’adoptè la veda de las corrudas de taurs dens ua de las soas purmèras leis.

...Villa 31...

Au long de l’arriu, Retiro qu’ostenda un ensemble de tors modèrnas de veire, alumini e beton conegut dab lo nom de Catalinas Nòrd enter las quaus ua de las mei ancianas qu’ei l’ostalaria Sheraton.


Per’mor de la concentracion de tant de punts estrategics deus transports e deus ahars, un sarròt de las linhas de colectivo que s’estancan a Retiro.