Pont de las Broishas
Lo pont medievau de Kastrexana (basco) o de Castrejana (espanhòu), tanben aperat pont de las Broishas o pont deu Cohet, sus l'arriu de Cadagua, que he partida deu Camin deu Nòrd deu Pelegrinatge de Sant Jacme de Compostèla. Qu'arreliga las arribas de las comunas biscaïnas de Barakaldo e Bilbao.
La soa construccion, miada per Pedro Ortiz, mèste de la vila de Lekeitio, que dataré de la fin deu sègle XIVau o deu començament deu XVau. Qu'avó un ròtle hèra important dinc au sègle XIXau per'mor que hasèva partida deu Camin Reiau qui arreligava Bilbao a Castelha a truvèrs de Balmaseda e de la vath de Mena. Qu'ei d'estil gotic, bastit en gres e constituit d'un solet arc. Las culadas que s'apujan suber las arribas arrocassosas de l'arriu. Lo pont que comencè de bastí's per l'arc. Los clavèus (las pèças qui forman l'arc) que i son constituits d'ua dobla arrengada de pèiras.
Qu'ei aperat pont deu «Cohet» per'mor mantua legenda qu'atribueish la soa construccion au Cohet eth medish. La mei anciana que conta ua joena que venè la soa amna au Cohet en escambi d'un pont qui'u servisse de passatge de cap a l'auta arriba de Cadagua on e vivèva lo son aimat. Non mancant pas qu'un clavèu entà acabà'u, la joena que se'n apeneí e lo cant deu poth qu'espantè lo Cohet. Atau que podó sauvar la soa anma, passant lo pont en tot tornar júnher lo son aimat.
D'autas legendas qu'atribueishen la construccion aus gènis de nom «mikolas». Aquestes diablotins que's situavan un darrèr l'aute despuish la peirèra dinc au pont, en balhant las pèiras l'un a l'aute.
Referéncias
[modificar | Modificar lo còdi]- ↑ Pòrt de Bilbao. Autoritat Portuària de Bilbao.
