Museum d'Istòria Naturala d'Ais de Provença
Lo Museum d'Istòria Naturala d'Ais de Provença es un musèu d'istòria naturala situada a Ais de Provença. Es famós per sei colleccions paleontologicas que presentan plusors fossils de dinosaures descubèrts en Provença. Pasmens, dempuei 2014, a degut arrestar seis activitats d'exposicion publlica en causa d'un problema immobilier.
Istòria[modificar | Modificar lo còdi]
Lo Museum d'Istòria Naturala d'Ais de Provença a una istòria trebolada compausada de cicles d'activitat importanta e de periòdes de quasi letargia. Foguèt creat en 1838 après la crompa de la colleccion d'espècias d'aucèus exotics de Magdalena Carle. D'autrei scientifics locaus cediguèron de colleccions e lo musèu foguèt inaugurat lo 4 de mai de 1839. Dins lo corrent dau sègle XIX, reçaubèt ansin regularament de colleccions novèlas, mai l'interès de la populacion demeniguèt e, a la mòrt dau conservator Camil Leon Mesplès en 1893, lo musèu èra mau entretengut.
Aqueu periòde s'acabèt dins leis ans 1890 amb la cession de l'importanta colleccion de mineraus, de fossils e de cauquilhatges de Loïsa Rostan d’Abancourt (1848-1903), rapidament completada per una cession similara de part dau doctor Felip Aude. En mai d'aquò, lo musèu reçaupèt lo sostèn dau paleobotanista Gaston de Saporta (1823-1895). Aquò permetèt l'inauguracion d'una sala novèla, la « sala Loïsa Rostan d’Abancourt », e suscitèt tornarmai l'interès dau public e dei donators. Ansin, un bastiment novèu foguèt construch per assostar lei colleccions. Inaugurat en 1905, rescontrèt un certan succès, mai deguèt arrestar seis activitats durant la Premiera Guèrra Mondiala. Après una restauracion, foguèt tornat inaugurar en 1921. Aqueu periòde correspònd a l'apogèu dau musèu que fasiá d'aqueu temps partida dei cinc musèus d'istòria naturala pus importants de França.
En 1944, un incendi destruguèt una partida dei colleccions e la comuna deguèt cercar un endrech novèu ont installar lo musèu. En 1950, posquèt arrendar l'Ostau Boièr d'Agulha. Lei locaus foguèt inaugurats en 1953. La descubèrta d'uòus de dinosaures dins lo massís de Venturi engendrèt tornarmai l'interès dau public per la paleontologia provençala. Dins leis ans 2000, lo musèu veguèt sa frequentacion aumentar de 20 000 visitaires anuaus en 2001 a mai de 40 000 en 2013. Pasmens, dins leis ans 2010, un projècte de desmainatjament dau musèu vèrs de locaus pus grands foguèt blocat per de problemas juridics. Dempuei 2014, lo Museum es donc privat de luòc d'exposicion publica. Aquela situacion perdurava encara dins leis ans 2020.