Mission diplomatica
Una mission diplomatica es un grop de personas nomats per un Estat present dins un autre Estat en vista d'i representar l'Estat d'origina. Istoricament, aquelei missions èra sovent provisòrias mai dins lo mond actuau, son generalament vengudas permanentas. L'Estat d'origina dei membres de la mission es dich « Estat acreditant » e l'Estat d'acuelh es dich « Estat acreditor ». Lei membres de la mission son normalament de diplomatas plaçats sota l'autoritat d'un cap de mission.
Lei missions diplomaticas actualas[modificar | Modificar lo còdi]
Foncions[modificar | Modificar lo còdi]
Lei foncions actualas d'una mission diplomatica son definidas per l'article 3 de la Convencion de Viena de 1961 :
- la representacion de l'Estat acreditant.
- la proteccion deis interès de l'Estat acreditant e de sei ressortissants dins lei limits autorizats per lo drech internacionau.
- la menada de negociacions entre l'Estat acreditant e l'Estat acreditaire.
- l'informacion per totei lei mejans autorizats per lo drech internacionau sus l'evolucion deis eveniments que se debanan dins l'Estat acreditaire.
- lo desvolopament de relacions amicalas, especialament dins lei domenis economics, culturaus e scientifics.
- l'exercici de missions consolaras. Aquelei missions regardan la gestion dei relacions entre l'Estat acreditant e sei ciutadans que rèstan dins l'Estat acreditaire.
Leis articles 45 e 46 definisson de foncions excepcionalas coma la presa en carga de la proteccion deis interès d'un Estat tèrç qu'auriá romput sei relacions amb l'Estat acreditaire.
L'acreditacion d'una mission[modificar | Modificar lo còdi]
Lei missions pus importantas, dichas « ambaissada », son dirigidas per un « ambaissador » qu'es lo representent d'un cap d'Estat pròche d'un autre cap d'Estat. Aqueu títol es lo reng pus aut que pòu ocupar un diplomata en mission. Per intrar en foncion, un cap de mission dèu èsser acreditat. Per aquò, dèu presentar a l'Estat acreditor de letras credencialas emesas per l'Estat acreditant. Es possible d'acreditar un meteis ambaissador dins mai d'un país. L'acceptacion dei letras credencialas a normalament luòc durant de ceremònias regularas. De discussions prealablas permèton sovent l'acceptacion sistematica dei letras credencialas mai pòu encara i aver d'excepcions e de refús.
Lo rèsta dau personau d'una mission diplomatica es chausit per l'Estat acreditant. Pasmens, dèu transmetre l'identitat d'aquelei personas a l'Estat acreditor. Lo nombre de personas dins la mission es generalament fixat per un acòrdi entre lei dos país. En l'abséncia d'acòrdi, l'Estat acreditor pòu limitar unilateralament lo nombre de personas que fan partida de la mission diplomatica. Cada membre de la mission, compres l'ambaissador, pòu èsser declarat persona non grata. Dins aqueu cas, la persona dèu quitar lo país.
L'immunitat diplomatica[modificar | Modificar lo còdi]
Lei diplomatas en mission benefician generalament d'una immunitat diplomatica dins lo quadre de sei foncions. Es una particularitat juridica qu'assegura au diplomata :
- l'inviolabilitat : es impossible de l'arrestar (franc dau cas de flagrant delicte).
- l'immunitat de juridiccion : lei tribunaus dau país d'acuelh an pas la competéncia per lo jutjar.
- l'immunitat d'execucion : es impossible de prendre una mesura d'execucion còntr eu.
Aquela proteccion es sovent estenduda ai personaus de la mission e a lor familha. Regarda unicament leis actes comés durant sei foncions e pòu èsser revocada per l'Estat d'origina. La possession d'un passapòrt diplomatic a sovent un liame amb l'immunitat diplomatica mai aquò es pas sistematic. D'efiech, l'immunitat es definida per d'acòrds entre lei dos Estats aguent establit de relacions. Lo passapòrt diplomatic es un document emés per un govèrn per facilitar lo trabalh de sei diplomatas.