Marc Cerrone
Marc Cerrone, o mai simplament Cerrone, nascut còsta París lo 24 de mai de 1952 a Vitry-sur-Seine (França), es un compositor e musician francés d'origina italiana. Es estat l'un dels grand noms del genre disco a la fin de las annadas 1970.
Per sos dotze ans, sa maire, Liliane Cerrone, li ofrís una batariá. Coma bataire, reivindica d'èsser influenciat pel rhythm and blues d'Otis Redding o la musica de Chicago, Cream, Jimi Hendrix e Santana.
En 1972, Cerrone fonda lo grop Kongas, que va durar quatre ans. Es remarcat per Eddie Barclay qu'o fa jogar al club de Sant Tropetz « Le Papagayo », puèi li fa signar un contracte li permetent d'enregistrar son primièr single Anikana-O en novembre d'aquela meteissa annada.
Ambe l'ajuda de son amic Raymond Donnez qu'a un estúdio d'enregistrament sus l'avenguda de l'Armada-Granda a París, realiza una maqueta a la debuta de l'annada 1976. Pasmens, Cerrone tròba qu'es melhor de far un album dins los estúdios de Londres en Anglatèrra. I enregistra Love in C Minor, un tròç d'una quinzena de minutas, tròp long per las ràdios, compausat de batariá, ambe la gròssa caissa mesa endavant, e d'una pista sonòra eissida d'un film pornografic american. Cap d'ostal de disques lo vòl pas engatjar, alavetz paga el meteis lo prètz de l'enregistrament, puèi distribuís qualques exemplars del disc a sas coneissenças.
Per astre, Champs Disques manda a Nòva York als Estats Units un carton de sos disques al lòc d'exemplars de disques de Barry White pr'amor que defectuoses. Lo distributor lo fa alavetz escotar a de discjòqueis, e es aital que lo títol comença de passar en ràdio e en discotèca. Quand Cerrone n'es informat, se precipita als Estats Units e capita de se far engatjar per Ahmet Ertegün. Fin finala, Love in C Minor es una gròssa capitada, recompensada d'un Grammy Award als Estats Units en 1976. Cerrone s'installa alavetz a Nòva York.
En 1976 comença tanben una collaboracion ambe Alain Wisniak, ambe qui va coescriure e far mantuns albums : Cerrone's paradise, Supernature, Cerrone V Agelina, Cerrone VI Panic, Cerrone VIII Back Track. Recep fòrça instruments en present coma un ARP Odyssey e experimenta per trobar lo son que l'interèssa.
L'annada seguenta son Grammy Award, sortís dos albums. Son segond album, Cerrone's paradise, realizat en febrièr e març de 1977, coneis un pauc mens de capitada que lo primièr. Pasmens, lo tresen, Supernature (Cerrone III), portat pel single eponim (Supernature) que demòra son mai gròs tube, e Give me Love, la benda originala del filme francés Brigade mondaine, es una capitada enòrma, ambe dètz milions de disques venduts. Supernature es atal vengut l'un dels grands imnes del disco.
En 2001, collabòra ambe lo discjòquei francés Bob Sinclar que publica l'album Cerrone by Bob Sinclar.