Mòstra de Cinèma Occitan
La Mòstra de Cinèma Occitan "Llanterna Digital" es una iniciativa nascuda en 2011 per tal de divulgar lo cinèma occitan en Catalonha. La primièra mòstra se faguèt del 5 al 6 de novembre de 2011 e foguèt inaugurada per la Directora Generala de Politica Lingüistica de la Generalitat de Catalonha, na Yvonne Griley [1].
Istòria[modificar | Modificar lo còdi]
La Mòstra de Cinèma Occitan “Llanterna Digital” es una iniciativa de la Coordinadora de Servicis Lingüistics de Lhèida, qu'es integrada per de representants del Secretariat de Politica Lingüistica de la Generalitat de Catalonha amassa amb lo Consòrci per la Normalizacion Lingüistica (CNL) de Lhèida, dels servicis territorials del departament d'Educacion, de Santat e de Justícia del govèrn catalan, del Servici Lingüistic de l'Universitat de Lhèida, de l'Escòla Oficiala de Lengas de Lhèida, e del Servici Lingüistic del sindicat Comissions Obreres.
L'inauguracion d'aqueste eveniment, que vòl far conéisser la produccion cinematografica occitana e a l'encòp la lenga a l'ensems de la societat catalana, se faguèt a l'Ateneu Barcelonès lo 3 de novembre de 2011 en preséncia d'Yvonne Griley e del vicesíndic primièr d’Aran, en Luís Carlos Medina. Aquesta Mòstra èra ja estada presentada en Occitània (a Vielha e a Tolosa), a Lhèida, La Seu d'Urgèl e mai Ostana abans d'arribar a Barcelona.
Programa del 4 e 5 de novembre de 2011[modificar | Modificar lo còdi]
L'edicion de 2011 presentèt un exemple de la diversitat de genres qu'existís dins la creacion occitana. Lo divendres 4 se projectèron La recreacion un cort-metratge de Karine Richard Bòrdanava e Gents de Vertor de Philippe Ayme.
L'endeman, lo dissabte 5 de novembre un dels filmes de referéncia del cinèma occitan, L’orsalhèr de Joan Flechet e puèi Ací laguens i ès tu, una òbra de corta durada que passa pas las 60 segondas realizada per Carla Benito, Carla Castellanos, Judith Faure, Gemma Masip, Sara Rodríguez e Patrícia Delgado, que ganhèt lo Prèmi Llanterna Digital de 2011.