Lily Allen

Lily Rose Beatrice Cooper (nascuda Allen), mai coneguda coma Lily Allen (Hammersmith, Londres, 2 de mai de 1985), es una cantaira, compositora e actritz anglesa. Foguèt a partir del succès de sa cançon "Smile" que se situèt a la cima de las cançons mai popularas en julh de 2006, que se faguèt conéisser internacionalament. Son primièr album Alright, Still aguèt una bona recepcion e se vendèt a mai de 2,6 milions d'exemplars mondialament, çò que faguèt qu'Allen foguèsse nominada als Grammy Awards, als BRIT Awards e als MTV Video Music Awards.

Biografia

Lily Allen nasquèt en 1985 a Hammersmith, un barri de l'oèst de Londres dins una familha d'artistas. Es la filha de l'actor galés Keith Allen e de la productora anglesa, Alison Owen; es la filhòla de la cantaire Angela McCluskey, membre del grop american Wild Colonials. Mudèron mai tard per s'installar dins l'arrondiment d'Islington, dins lo nòrd de la capitala anglesa. A una sòrre mai granda qu'ela, Sarah, un cabdet, Alfie Allen e mai una autra sòrre cabdeta, Rebecca. A mai a tanben mantun mièg fraires e sòrres que sos parents divorcièron quand èra joveneta. Aprèp la separacion Lily Allen visquèt amb sa maire e son companh, lo comedian Harry Enfield.

En 1988, a l'edat de tres ans, Lily Allen faguèt una brèva aparicion dins la sèria de television The Comic Strip Presents..., dins l'episòdi The Yob que son paire aviá coescrich. L'an seguent quand Lily aviá pas que quatre ans, son paire partiguèt de l'ostal. La futura cantaire demorèt alara amb la maire e visquèt dins un HLM durant son enfància. Faguèt pasmens son escolaritat dins divèrsas escòlas privadas de las mai caras del Reialme Unit. Fin finala, Lily Allen foguèt escolarizada dins 13 establiments diferents, que las mai famosas son Hill House School, Montreux sus las ribas del Lac Léman, Millfield e Bedales School. Ne foguèt expulsada mai d'un còp per aver begut o fumat.