Joan Baptista Senac

Joan Baptista Senac
Naissença	1693 Lombèrs
Mòrt	20 de deceme de 1770 Versalhas
País d'origina	Gasconha

Joan-Baptista Senac (1693–1770) qu’ei un mètge gascon. Qu'ei considerat coma lo fondator de la cardiologia. Qu’ei tanben prumèr mètge deu rei Loís XV de França e suberintendent de las aigas mineraus deu reiaume.

Biografia

Joan-Baptista Senac

Joan-Baptista Senac que neishoc en 1693, ça’m par a Lombèrs. La familha deu pair qu’ei d’Aus en Pardiac (uei Aus e Aussat) au ras de Mielan. Qu’ei ua familha borgesa qui teng quauquas tèrras. Lo gran-pair, Pèir, que hè lo notari e lo pair, Joan-Bernat, l’avocat. La mair, Maria Corregèr, qu’ei la hilha d’un notari. Lo coble que s’acasa en ua bòrda deu villatge de la hemna, Ariés en Manhoac (uei Ariés e Espenan).

Après l’enfança a Ariés, Joan-Baptista Senac que vau au collègi d’Aush, puish que seguish estudis de medecina, dont ua partida a Leyde (Holanda) dab lo professor renovator Herman Boerhaaven (1668-1738), puish a Londres dab lo gran John Freind (1675-1728).

En 1719, qu’ei nomat doctor en medecina a Montpelhièr e, en 1721, mèste es arts a Tolosa.

Lo 10 d’aost 1721, que’s marida dab Maria-Terèsa Tanet, hilha de mercadèrs aisats. Que partishen tà Paris. Ne tornaràn pas en Gasconha. Lo coble qu’a tres mainats : Joan (1723), Terèsa (1729), Gabrièu (1736).

En 1723, qu’entra a l’Acadèmia Reiau de las Sciéncias. Que vad doctor de la Facultat de Medecina de Rems en 1725, e prumèr mètge deu rei Loís XV en 1727.

Que’s mòr lo 20 de deceme 1770 a Versalhas. Loís XV, a maugrat deus sons 60 ans, ne prenguerà pas un navèth mètge.

Lo mètge

Joan-Baptista Senac que hè devís reconeguts, per exemple qu’explica perqué e coma un negat s’estofa.

Qu’ei progressista e que seguish las nautats quan las demonstracions son concludentas. Que sosteng las tèsis de l’Aleman Georg Ernst Stahl (1659-1734) qui vòu separar la medecina de la quimia (remèdis). Que sosteng tanben lo mètge Théodore Tronchin (1709-1781) qui practica l’inoculacion (que s’agish de méter en contacte ua persona dab un pauc de substància tirada de vesiculas d’un malaut drin atacat per la variòla).

Qu’estudia lo còr, las malaudias cardiacas, qu’identifica signes foncionaus associats, coma l’aritmia, la dificultat de respirar, lo desalen, o l’edèma de las camas. Qu’ei considerat coma lo fondator de la cadiologia.

Lo pintre Diego Rivera (1886-1957) que plaça Joan-Baptista Senac a l’endavant de la grana fresca Histoire de la cardiologie a l'entrada de l'Institut de cardiologia de Ciutat de Mexic.

Òbras

Sur les noyés, Jean-Bastiste Sénac, 1725

Traité de la structure du cœur, de son action et de ses maladies, T.1, M. De Sénac, 1741

Traité de la structure du cœur, de son action et de ses maladies, T.2, M. de Sénac,  1783

Referéncias

Du lieu de naissance et des attaches gasconnes de Sénac, premier médecin de Louis XIV. Guy Sénac de Monsembernard, Bulletin de la Société Archéologique, Historique, Littéraire et Scientifique du Gers, 4e trimestre 1987, p.407-437

Sénac de Meilhan, 1736–1803, Guy Sénac de Monsembernard, 1969

Sénac (Jean-Baptiste), Biographie universelle, vol. 42, Hippolyte de la Porte et Renauldin, p.1

Histoire de la cardiologie, Pascal Gueret,  2016