Joan Baptista Amat
Joan Baptista Amat (en francés: Jean-Baptiste Amat; Lairac de Tarn, 14 de julh de 1877 – Becièras, 9 d'agost de 1961) èra un politician occitan que foguèt deputat de 1928 a 1936 e puèi senador de Nauta Garona de 1936 a 1941.
Biografia
[modificar | Modificar lo còdi]Joan Baptista Amat nasquèt en 1877 al sen d'una vièlha familha de proprietaris agricòlas de Lairac. Faguèt los estudis segondaris e superiors a Tolosa. S'inscriguèt a la Facultat de medecina de la vila mondina e lèu venguèt un dels animadors de las joventuts radicalas. Venguèt doctor en medecina e s'installèt a Becièras, vila que coneissiá e apreciava dempuèi fòrça annadas. Gràcias a son saber prigond del campèstre e de las questions agricòlas, capitèt pro lèu de venir cònsol de Becièras, conselhièr d'arrondiment de Montastruc, e puèi president del conseil d'arrondiment de Tolosa. A las eleccions generalas dels 22 e 29 d'abril de 1928, ganhèt e venguèt deputat de la 3a circonscripcion de Tolosa al 2n torn d'escrutin amb 6.713 vòtes contra 5.243per son concurrent Bellet.
Se faguèt membre del grop republican radical e radicalsocialista e participèt a la Commission d'assegurança e de prevesença socialas e a la Commission de l'igièna. Raportèt la proposicion de lei de Bussat que tendiá a refortir los mejans per luchar contra la tuberculòsi (en 1929), lo projècte de lei tendent a modificar la lei del 19 de decembre 1917 relativa als establiments perilhoses e insalubres, la proposicion de lei de Raoul Brandon tendant a acordar lo secours de caumatge als artesans, obrièrs e emplegats que fan pas a un trabalh permanent (1931) e la proposicion de lei de Xavièr Valat relativa a l'institution d'un òrdre dels farmacians (1932). Depausèt mantuna proposicion de lei amb tòca de far beneficiar de l'ajuda de l'Estat los cultivadors del país tolosan victimas de las calamitats naturalas e s'avodèt pro particularament a l'equipament del campèstre e a la realizacion de las òbras d'adduccion d'aiga e d'electrificacion. Participèt a mai a la discussion del projècte de lei relatiu al comèrci dels blats (1929, 1931) e del projècte de lei referent a la viticultura e lo comèrci dels vins (1931).