Invasions vikingas de Galícia

Un article de Wikipèdia, l'enciclopèdia liura.
Salta a la navegació Salta a la cerca

Leis invasions vikingas de Galícia foguèron una tiera d'atacas e incursions vikingas menadas dau sègle IX au sègle XII còntra Galícia.

La premiera invasion se debanèt dins lo corrent d'aost de 844 ambé l'arribada d'un grop de Vikings separats d'una expedicion dirigida còntra Garona per una tempèsta. Pilhèron quauquei vilatges mai foguèron arrestats per lei fortificacions de La Coronha. Pasmens, en 858, arribèt una granda flòta que faguèt lo sètge de Sant Jaume de Compostèla e obtenguèt lo pagament d'un tribut en cambi de sa partença. Aquò empachèt pas la perseguida dei pilhatges litoraus fins a una victòria navala dau còmte Pedro que capitèt de destrurre 38 naviris vikings.

Aquela revirada limitèt l'amplor deis expedicions vikings còntra la region galèga fins a 951 e 964 mai lei vilas èran pron protegidas per defugir per rebutar una ataca eventuala. Pasmens, la situacion cambièt a partir de 968 ambé l'establiment permanent d'un gròs nombre de Vikings en Normandia. D'efèct, aquò li donava una basa en Euròpa Occidentala que permetiá d'organizar d'incursions còntra lei regions alunchadas d'Escandinàvia. Reputada rica gràcias au romavatge de Sant Jaume de Compostèla, Galícia venguèt la buta d'atacas pus importantas. Una flòta de 200 naviris se dirigiguèt vèrs la region e ataquèt lo diocèsi de Bretoña e Compostèla. Lo 29 de març, ganhèron la batalha de Fornelos onte l'evesque Sisnand II foguèt tuat. Aquò entraïnèt lo pilhatge de la màger dau diocèsi e lei Vikings demorèron en Galícia fins a 970 e la mòrt dau cap viking menant l'expedicion dins una batalha còntra lo còmte Gonzalo Sánchez.

Après aqueleis eveniments, leis incursions vikings en Galícia venguèron mens frequentas. En 1015, una flòta importanta ataquèt Castropol, Betanzos, Ribas de Sil e Tuy. La darriera vila foguèt pilhada e totalament destrucha après una desfacha saunosa de l'armada dau còmte Menedo. En 1026, plusors abitants foguèron capturats e liberats en cambi d'un recapte. En revènge, una expedicion menada en 1028 subiguèt una desfacha còntra lei fòrças de l'evesque Cresconio de Compostèla.

Lei progrès de l'evangelizacion dei regions nòrdicas favorizèron la fin deis invasions vikingas. En plaça, mai d'un Escandinau, compres de senhors importants coma lo rèi Sigurd Ièr en 1108, venguèron cumplir lo romavatge de Sant Jaume de Compostèla. Lo renfòrçament dau prestigi d'aquela vila coma luòc sacrat foguèron la consequéncia principala deis invasions vikingas de Galícia ambé la destruccion deis evescats galècs rivaus.

Liames intèrnes[modificar | modificar la font]

Bibliografia[modificar | modificar la font]

  • (gl) Vicente Almazán, Gallaecia Scandinavica, Editorial Galàxia, 1986.
  • (gl) Eduardo Morales Romero, Eduardo Us víkings a Galícia, 1997.

Nòtas e referéncias[modificar | modificar la font]