Indochina francesa
L'Indochina francesa èra lo nom d'una partida de l'Empèri coloniau francés. Gropava lei colonias, lei protectorats e lei comptadors situats dins la peninsula indochinesa. Sa conquista se debanèt de 1862 a 1904 après una tièra de guèrras còntra leis estats locaus e vesins. Après l'afondrament de son autoritat coloniala durant la Segonda Guèrra Mondiala, França assaièt sensa succès de reconquistar la region mai se turtèt a la resisténcia acarnada d'una guerilha comunista e independentista (Guèrra d'Indochina). En 1954, après la desfacha de Dien Bien Phu, França abandonèt oficialament la region que foguèt devesida entre Vietnam dau Nòrd, Vietnam dau Sud, Laos e Cambòtja.