Guèrra de la Faissa d'Agacher
|
Guèrra de la Faissa d'Agacher
| |
|---|---|
| Informacions generalas | |
| Data | 25 - 30 de decembre de 1985 |
| Luòc | Faissa d'Agacher |
| Casus belli | Question dau partiment de la Faissa d'Agacher entre Burkina Faso e Mali |
| Eissida | Partiment dei regions contestadas |
| Belligerants | |
 Burkina Faso
|
 Mali
|
| Pèrdas | |
| 141 mòrts 257 bleçats |
38 mòrts 17 bleçats |
La Guèrra de la Faissa d'Agacher es un conflicte internacionau qu'opausèt Burkina Faso e Mali en decembre de 1985. Foguèt entraïnada per de desacòrdis frontaliers dins la region de la Faissa d'Agacher onte l'administracion coloniala francesa aviá jamai definit d'un biais precís lo traçat dei limits. La preséncia supausada de ressorsas mineralas aumentèt l'interès per la zòna. En 1974, d'escaramochas avián ja opausat lei doas armadas dins la region. Pasmens, en 1985, lei dos país, minats per de tensions intèrnas, veguèron dins una guèrra dubèrta una ocasion de tornar soudar seis opinions publicas.
A partir de novembre de 1985, lo govèrn burkinabe decidèt de mandar de foncionaris dins la region contestada per i recensar la populacion. Mali considerèt aquela accion coma una violacion de sa sobeiranetat e mandèt pauc a cha pauc de fòrças militaras. Lei premiereis escaramochas comencèron lo 21 de decembre e la guèrra foguèt declarada quatre jorns pus tard. Lei Malians ataquèron totei lei vilatges contestadas e menèron d'operacions de bombardament còntra de vilas burkinabes (Djibo, Ouahigouya, etc.). En inferiotat numerica, lei militars burkinabes subiguèron de pèrdas importantas, mai capitèron de resistir. Pasmens, en causa d'una logistica limitada, leis operacions importantas s'arrestèron rapidament e una alta-au-fuòc foguèt signada lo 30 de decembre.
Lei dos adversaris acceptèron de fisar son conflicte a la Cort Internacionala de Justiciá que decidèt de partejar la region contestada. Lo bilanç uman es estimat a 141 tuats e 257 bleçats per Burkina Faso e a 38 tuats e 17 bleçats per Mali. La màger part dei pèrdas malianas èran d'origina militara, mai la populacion civila burkinabe foguèt tocada, especialament durant lo bombardament dau mercat d'Ouahigouya.
Liames intèrnes
[modificar | Modificar lo còdi]Bibliografia
[modificar | Modificar lo còdi]- (fr) A. Damiba, Le conflit Mali-Haute-Volta: une illustration des problèmes de frontières en Afrique, Ouagadougou, Université de Ouagadougou, 1982.
- (fr) H. Derme, Le conflit entre le Burkina Faso et la République du Mali : point de vue historique, París, Université Paris I, 1988.
- (fr) Camille Lefebvre, Frontières de sable, frontières de papier. Histoire de territoires et de frontières, du jihad de Sokoto à la colonisation française du Niger, XIXe – XXe siècles, París, Publications de la Sorbonne, 2015.