Dashiell Hammett
Dashiell Hammett (27 de mai de 1894, Baltimore - 10 de genier de 1961, New York) es un escrivan e scenarista estatsunidenc de la premiera mitat dau sègle XX.
Après una enfança dificila dins una familha paura, comencèt de trabalhar a 14 ans dins de sectors variats (corsier, emplegat d'una companhiá de camin de fèrre, clergue a la Borsa...) avans de venir detectiu privat per l'agéncia Pinkerton durant sièis ans. Demissionèt car, coma simpatizant comunista, refusèt de participar ais activitats antigrèvas de l'agéncia. Pasmens, aquela experiéncia li permetèt de menar d'enquistas sus d'afaires importants e de descubrir l'elèit estatsunidenc dau periòde e lo crim organizat.
A la fin deis ans 1920, imaginèt un estil novèu de roman policier que foguèron publicadas dins la revista Black Mask. I obtenguèt plusors succès literaris importants amb de romans denonciant la corrupcion au sen de l'elèit economic e politic coma La Meisson roja (1928), Sang maudit (1928), lo Faucon de Malta (1930) ò la Clau de vèire (1931). Durant leis ans 1930, Hammett veguèt sei libres adaptats au cinèma e comencèt de trabalhar coma scenarista per Hollywood. Pasmens, au començament de la Guèrra Freja, i foguèt secutat, e brèvament arrestat durant lo maccartisme, en causa de seis idèas progressistas. Excluch de l'industria cinematografica, venguèt alcoolica e moriguèt en 1961.
Dashiell Hammett es considerat coma lo fondator dau roman sorn modèrne impausant lo personatge dau detectiu privat dur e determinat obligat d'evoluir dins d'univèrs onte lei nocions de ben e de mau son pauc claras. Aquel estil, dich Hard-boiled School, marquèt una rompedura importanta amb leis òbras d'autors coma Agatha Christie (1890-1976) que metián en scena de personatges pus aristocratics. Aquel estil demòra uei un aspècte major dei romans ò dei films policiers modèrnes.
Liames intèrnes[modificar | Modificar lo còdi]
Bibliografia[modificar | Modificar lo còdi]
- (fr) Claude Mesplède (dir.), Dictionnaire des littératures policières, vol. 1 : A - I, Joseph K, coll. « Temps noir », 2007, pp. 923-926.
- (fr) Claude Mesplède, Les années "Série noire" : bibliographie critique d'une collection policière, vol. 1 : 1945-1959, Editions Encrage, coll. « Travaux » (n°13), 1992.
- (fr) Claude Mesplède, Les années "Série noire" : bibliographie critique d'une collection policière, vol. 2 : 1959-1966, Editions Encrage, coll. « Travaux » (n°13), 1993.