Cròs de Revelhon

Un article de Wikipèdia, l'enciclopèdia liura.
Salta a la navegació Salta a la cerca


Vista del pòrge d'intrada del Cròs de Revelhon

Lo cròs de Revelhon, a Albinhac, es una immensa cavitat naturala sosterranha que forma un site espeleologic excepcional.

Situacion[modificar | modificar la font]

Se situa a 100 m del masatge de Revelhon, a 2 km a l'èst d'Albinhac e a 4,5 km al nòrd-èst de Ròc Amador, en Carcin, dins lo departament d'Òlt. La pichona rota que va de Revelhon a Lasbras passa en dessús de la vòlta del pòrge d'intrada a 100 m de la quòta 312 que es lo punt d'interseccion amb la D673. Se dobrís a las confinhas de Limarga (èst) e del Causse de Gramat (oèst), a l'endrech ont lo riusset de Salgues venent d'Albinhac se pèrd jos tèrra, dins una dolina boscosa.

Accès e risques[modificar | modificar la font]

L'intrada, en forma de cauna, es dins una proprietat privada. L'accès e lo percors presentan de perilhs pels profans en tecnicas espeleologicas, en particular, la risca de casuda en periòde umid dins la zona d'intrada o a l'interior de la cavitat dins un potz; la risca de casuda de pèiras dins lo pòrge d'intrada, zona fresca e magnifica que es perilhós de s'i arrestar (de blòcs se destacan regularament de la vòlta fenduda e geliva donc cal passar ras de la paret de drecha); la risca de s'aperdesir dins los corredors de la partida fossila; e la risca de demorar presonièr detràs de los sifons (P. Vidal indiquèt en 1955 aver vist lo pòrge d'intrada plen d'aiga; de corrents d'aiga violents modifican alavetz los emplenatges; lo sifon Martel s'emplís en mens de 2 oras, mas se pòt voidar en 2 setmanas en periòde sec). Las partidas fossilas devon èsser evitadas de novembre a març, que son utilizadas coma luòc d'ivernacion per las ratapenadas.