Batalha d'Alalia
|
Batalha d'Alalia
| |
|---|---|
| Informacions generalas | |
| Data | vèrs 540-535 avC |
| Luòc | Probablament lòng dau litorau orientau de Corsega |
| Cambiaments territorials | Abandon dau comptador d'Alalia per lei Focèus |
| Eissida | Victòria tactica dei Focèus Victòria estrategica deis Etruscs e dei Cartaginés |
| Belligerants | |
| Focèus d'Occident | Cartage |
| Fòrças en preséncia | |
| 60 naviris | 120 naviris |
| Pèrdas | |
| 40 naviris | Desconegudas mai importantas |
La batalha d'Alalia se debanèt vèrs 540-535 avC probablament lòng dau litorau orientau de Corsega entre una flòta formada per lei ciutats-estats focèas de Mediterranèa Occidentala e una aliança gropant Cartage e dei ciutats etruscas (magerament Caere).
Lei causas de la batalha èran multiplas. D'efècte, après la conquista de Focea per lei Pèrsas en 546, una partida importanta de seis abitants avián quitat la vila per s'installar dins sei colonias de Mediterranèa Occidentala, en particular Marselha que venguèt un centre comerciau important. Aquò modifiquèt leis equilibris regionaus e menacèt lei posicions etruscas e cartaginesas. Pasmens, la causa immediata de l'afrontament foguèt la volontat cartaginesa e etrusca de destrurre lo comptador focèu d'Alalia qu'èra vengut una basa de piratas. Aquela ataca entraïnèt una reaccion de l'ensems dei vilas focèas que reüniguèron sa flòta per defendre la colonia.
Lo combat s'acabèt per de resultats mitijats segon leis interès dei diferents camps. De'n premier, lei Grècs gardèron lo contraròtle dau prat batalhier maugrat de pèrdas importantas (40 naviris sus 60 engatjats). Lei pèrdas de la coalicion semblèron tanben importantas, especialament per lei Cartaginés. Pasmens, lo succès tactic grèc foguèt limitat car Alalia èra d'ara endavant impossible de defendre còntra una ataca novèla e lo comptador foguèt finalament abandonat. Leis Etrucs foguèron donc lei venceires principaus de la batalha car poguèron ocupar lo litorau de Corsega. Lei Marselhés, maugrat la desfacha, semblèron tanben contentats per la captura d'un butin fòrça important car mandèron una ofrenda de regraciament fòrça importanta a Dèlfes.