Jean de Lattre de Tassigny

Un article de Wikipèdia, l'enciclopèdia liura.
Anar a : navigacion, Recercar
Fotografia dau generau Montgomery, dau generau Eisenhower, dau manescau Júkov e dau generau de Lattre de Tassigny lo 5 de junh de 1945 a Berlin.

Jean Joseph Marie Gabriel de Lattre de Tassigny (2 de febrier de 1889, Mouilleron-en-Pareds - 11 de genier de 1952, Neuilly-sur-Seine) foguèt un generau e un manescau de França.

Intrat dins l'armada francesa en 1911, foguèt bleçat cinc còps dins lo corrent de la Premiera Guèrra Mondiala e recebèt la Legion d'Onor e la Military Cross. Vengut generau en 1939, se destrièt durant la batalha de França e capitèt de gardar la coeréncia de sei tropas fins a l'armistici de junh de 1940. Demorèt dins l'armada de Vichèi fins a setembre de 1943. En decembre d'aquela annada, foguèt nomat a la tèsta de la Ia Armada Francesa per lo generau de Gaulle. Participèt au desbarcament de Provença, a la liberacion de França e ai campanhas de Ren e de Danubi. Lo 8 de mai de 1945, representèt França a la ceremònia de capitulacion dau Tresen Reich.

Après la Segonda Guèrra Mondiala, foguèt lo cap suprèm dei fòrças francesas en Alemanha (1945) puei cap d'Estat Major generau de la Defensa nacionala (1945-1947) e comandant dei fòrças terrèstras de l'OTAN en Euròpa (1948-1950) ambé lo manescau Montgomery. En 1950, foguèt mandat en Indochina onte prenguèt la direccion dau còrs expedicionari francés. Infligiguèt plusors desfachas ai fòrças dau Viet Minh que permetèron de redreiçar la situacion dei Francés en Tonkin.

Malaut e fatigat, se retirèt en 1951 e moriguèt lo 11 de genier de 1952. Foguèt nomat manescau de França a títol postum per lo president Vincent Auriol lo 15 de genier seguent.

Liames intèrnes[modificar | modificar la font]

Bibliografia[modificar | modificar la font]

Nòtas e referéncias[modificar | modificar la font]