Trance
La trance es un estili de musica electronica eissit de la tècno qu'a espelit mai que mai en Alemanha al mièg de las annadas 1990. Se caracteriza per un tempo rapid entre 125 e 160 bpm (trucs per minuta), un aspècte plan melodic assumit e repetitiu, e una fòrma musicala montanta e descendenta.
La trance es un genre en el meteis, mas es de còps associat a la dream (es pr'amor d'aquò que se parla sovent puslèu de dream trance) : la trance es identificada alavetz coma sonque un sosgenre de la dicha dream. La trance partatja ambe la dream la màger part dels critèris, puslèu o sovent d'instrumetals (sonque eventualament una votz en bocla), l'accent botat sus la melodia etc, la sola diferéncia evidenta es lo tempo, qu'es pas forçalament rapid per la dream. Per far simple, se pòt díser que la trance es una mena de dream ambe un tempo rapid.
D'unes dison que la sorga de la trance se diu cercar dins la musica electronica del grop britanic KLF, ambe per exemple lo títol Last Train to Trancentral en 1990-1991, o alavetz en çò del grop house (new beat) italian-bèlga Age of Love ambe precisament lor títol emblematic Age of Love en 1990 ; pasmens, una majoritat dels pionièrs o dels artistas aparentats a n'aqueste estili musical èran essencialament d'alemands actius al mièg e a la fin de las annadas 1990, Dance 2 Trance, Cygnus X, Cabballero, Sash!, Brooklyn Bounce, Paul van Dyk...
Contemporanèu de la debuta del vam de la trance en Alemanha, lo tròç Dreams del discjòquei australian Quench es estat l'un dels primièrs grands tubes internacionals de la dream trance en 1994.
Demest los artistas emblematics de la trance a son apogèu a la fin de las annadas 1990 e dins las annadas 2000, se pòt citar los discjòqueis neerlandeses Armin van Buuren e Tiësto, los suedeses d'Antiloop, o encara lo discjòquei finlandés Darude.