Torre de la Babòta

Un article de Wikipèdia, l'enciclopèdia liura.
Torre de la Babòta

La Torre de la Babòta es un vestigi dels ancians barris de la vila de Montpelhièr, en Lengadòc. Al sègle XVIII, aguèt la foncion d'observatòri astronomic.

La torre de la Babòta desubre una gravadura de 1783

La torre de la Babòta es una de las vint e cinc torres de l'encencha fortificada qu'aparava la vila de Montpelhièr a la fin del sègle XII. Nauta de vint e sièis mètres, ne 'n demora lo darrièr vestigi amb la torre dels Pins.

En 1739, l'Acadèmia reiala de las sciéncias demandèt l'autorizacion de i establir un observatòri d'astronomia, çò que li foguèt acordat pel director general de las fortificacions, lo marescal d'Asfeld. L'enauçament de la torre a partir de la parabanda, data d'aquesta epòca. Lo trabalh s'acabèt en 1745. L'observatòri foncionèt entrò 1793.

En 1832, la Babòta assostèt lo telegraf Chappe. A la fin del sègle XIX, la Societat colombofila d'Erau i installèt sos colombs. Los astronòms tornèron far sas observacions dins la torre entre 1902 e 1922. La Federacion d'astronomia populara amator del Miègjorn i a son sèti dempuèi 1981.